سائق ميكروباص يتعدى على صحفية بالطريق العام.. والمجني عليها: ضربني بالبونيات في وشي | تحقيقات
تباشر جهات التحقيق ببولاق الدكرور، التحقيق في واقعة تعدي سائق عشريني على صحفية تدعى ولاء عمران، مساعد رئيس تحرير بجريدة الجمهورية، بالطريق العام بأحد مواقف الميكروباصات، حيث قام السائق بالتعدي عليها وسبها بألفاظ خادشة للحياء.
ووجهت جهات التحقيق للمتهم، أنه قام بإحداث إصابات بها استغرقت أقل من 21 يوما بحسب التقرير الطبي حول الواقعة، وحصل القاهرة 24 على نص التحقيقات وجاء على النحو التالي:
أقوال المجني عليها
س: ما تفصيلات حدوث إصابتك؟
ج: اللي حصل إني كنت راجعة من مدرسة ولادي علشان أدفع المصاريف وطالعة من المدرسة، وماشية أنا وأولادي ومعدية من جنب ميكروباص وسواق الميكروباص واقف، فقولتله لو سمحت عديني فقالى ما تعدي يا بنت.. فقولتله لو محترمنش نفسك هكلم الشرطة قام شتمني ولسة بطلع التليفون علشان أطلب الشرطة قام مسكنى من دراعي اليمين وضربني بالبونيات في وشي وأحدث إصابتي بكدمة تحت عيني اليسرى وكدمة بدراعي اليمين وكدمة وخدوش بالشفة السفلى من الجانب الأيسر وكدمة بالرقبة.
بعدها اتصلت بالنجدة وهو هرب أول لما لقاني كلمت النجدة قام طالع يجري، والنجدة جت وخدوني على قسم بولاق الدكرور، وهناك وروني صورة المتهم واتعرفت عليه ونزله جابوه من الشارع وجابوه على النيابة.
س: متى وأين حدث ذلك؟
ج: الكلام ده حصل يوم الخميس 22 سبتمبر 2022 حوالي الساعة 1:30 مساء في شارع العشرين بولاق الدكرور.
س: ما مناسبة تواجدك بالزمان والمكان سالفي الذكر؟
ج: أنا كنت راجعة من مدرسة أولادي ومروحة على البيت.
س: من كان معك آنذاك؟
ج: أنا كنت لوحدي
س: من القائم بارتكاب تلك الواقعة؟
. ج: هو اللي اسمه ز.ي
س: ما هي كيفية لقاءك بالمتهم تحديدا؟
ج: أنا ماشية في شارع العشرين والمتهم كان واقف مع سواق راكب ميكروباص وكانوا قافلين الشارع وأنا مش عارفة أعدي وقالى ما تعدي فقولتله هعدي إزاى قام شتمني شتيمة قذرة، فوقفت وقلتله إني هبلغ الشرطة شتمني تاني وقالى، كلمي اللي تكلميه، أول لما طلعت موبايل قام مسكني من دراعی وتعدى عليا بالضرب وأحدث إصابتي.
س: هل من ثمة أسلحة أو أدوات كانت بحوزة المتهم سالف الذكر؟
ج: لا.
س: وما كيفية تعدى المتهم سالف الذكر عليكِ؟
ج: هو الأول مسكني من دراعي اليمين جامد بإيده، وبعدها أنا مسكت في التيشيرت بتاعه قام ضاربني بونيات بإيده في وشي من الناحية الشمال وعورني في شفتي وعيني.
س: وماهي وجهتك بالنسبة للمتهم؟
ج: هو كان في وشي بالضبط والمسافة بيني وبينه لا تتعدى النصف متر تقريبا.
س: وكم عدد الضربات التي كالها لك المتهم آنذاك؟
ج: هو ضربني ضربات في وشي ورقبتي ودراعي.
س:وما الإصابات التي بكِ من جراء ذلك؟
ج: أنا عندي كدمة في دراعي اليمين وكدمة تحت العين اليسرى، وكدمة وسحجات بالشفة السفلية من الناحية اليسرى وكدمة وسحجات برقبتي.
س: وهل كان المتهم سالف الذكر على علم بمكان تواجدك آنذاك؟
ج: لا
س: وما هي حالة الضوء والرؤية والمكان من حيث المارة آنذاك؟
ج: كانت كويسة والشارع كان فيه ناس.
س: هل من ثمة شاهد أبصر تلك الواقعة؟
ج: أيوه الشارع كله شاف اللي حصل
س: وما سبب قيام المتهم بارتكاب تلك الواقعة؟
ج: كل ده علشان قلتله لو سمحت عديني.
س:هل من ثمة خلافات بينك وبين المتهم؟
ج: لا
س: ما هي مدة علاجك؟
ج: أقل من واحد وعشرين يوما.
وبم تتهمين المتهم تحديدًا؟
ج: أنا بتهمه بالضرب وإحداث إصابتي.
س: هل لديك أقوال آخرى؟
ج: لا
أقوال المتهم بالتعدي على سيدة في الطريق العام
س: ما قولك فيما هو منسوب إليك من إنك متهم بالتعدي بالضرب على المجني عليها ولاء عبد الله عمران طعيمة محدثا إصابتها الواردة بالتقرير الطبي؟
ج: محصلش
س: ما الذي حدث وما هي ظروف إحضارك؟
ج: اللي حصل إن أنا كنت شغال على الميكروباص بتاعي وواقف في الموقف، وفتحت باب الميكروباص فالباب خبط فيها قامت شتماني قمت راددلها الشتيمة قامت ضرباني بالقلم، وفضلت ماسكاني من هدومي فزقتها وطلعت أجري ومشيت وعرفت أن المباحث بتدور عليا في الموقف وجالي تليفون من المباحث وقالولي إنهم عاوزني في المباحث وروحتلهم على القسم وهو ده كل اللى حصل.
س: متى وأين حدث ذلك؟
ج: الكلام دا حصل أول امبارح يوم الخميس بتاریخ 22 سبتمبر 2022 الساعة 1 مساء شارع العشرين بولاق الدكرور، وروحت على القسم لما عرفت أنهم يدوروا عليا إمبارح بتاريخ 23 إبريل الساعة واحدة صباحًا.
س: ما مناسبة تواجدك بالزمان والمكان سالفي الذكر؟
ج: كنت شغال على الميكروباص بتاعي
س: من كان رفقتك آنذاك؟
ج: أنا كنت لوحدي بس كان فيه ناس كبير في الشارع
س: ماذا عثر بحوزتك أثناء التفتيش؟
ج: أنا كان معايا سجاير وخمسين جنيه
س: ما قولك فيما قررته المجنى عليها بمحضر جمع الاستدلالات وتحقيقات النيابة العامة تلوناه عليه تفصيلا؟
ج: الكلام ده محصلش وهي لما شتمتني أنا ردديتلها الشتيمة قامت ماسكة فيا فقمت زاققها أطالع اجري.
س: ما قولك فيها جاء بالتقرير الطبي الخاص بالمجني عليها العامة؟
ج: والله مش أنا اللي عورتها، اللي عمله زقيت إيديها علشان كانت ماسکة فيا وطلعت أجري.
س: ما قولك فيما جاء بمذكرة الضبط المحررة بمعرفة الرائد أحمد؟
ج: الكلام ده محصلش وأنا اللي سلمت نفسي في القسم لما عرفت إنهم بيدوروا عليا.
س: ولماذا تدعي سالفة الذكر عليك بذلك؟
ج: معرفش
س: وما قولك فيما جاء بمحضر التحريات المحرر؟
ج: الكلام ده محصلش
س: هل لديك سوابق جنائية؟
ج: لا
