سلوى خطاب لـ القاهرة 24: أنا مع تطور الأفكار وجرأتها.. والناس تتربى في بيوتها
كشفت الفنانة سلوى خطاب رأيها في طرح أفكار جريئة ومناقشتها في الأعمال الفنية سواء في الدراما أو السينما، مشيرة إلى أن نتفليكس لها وضع خاص وفي النهاية الجمهور هو صاحب القرار.
وأضافت سلوى خطاب في تصريحات لـ القاهرة 24: أنا مع تطور الأفكار وجرأتها، ويجب أن يكون هناك جرأة في الأفكار لأن المجتمع تغير وإحنا مش هندفن نفسنا في الرمل والمجتمع أصبح فيه كل شيء.
الأفلام مش هتعلم الأخلاق
وعن رأيها في اتهام البعض للفن بالتسبب في انتشار الجريمة قالت: الواقع في عنف أكتر من الأفلام، وبلاش نظلم الأفلام لأنه يوجد الجيد والسيء، وهناك أفلام كوميدي وأكشن، والأفلام مش هتعلم الأخلاق لكنها هتضع مبادئ والناس تمشي عليها، لكن ليس مش رسالتها تربي، الناس تتربى في بيوتها وفي مدارسها.
وأضافت: السوشيال ميديا متقسمة نصين ناس بتشتم وناس بترد الشتيمة وبستغرب منهم إزاي بيلاقوا وقت، وأنا بشوف أنها مهاترات والناس اللي بتشتغل ما عندهاش وقت للكلام يا ريت يسيبوا الموبايل ويشتغلوا شوية.
وفي سياق آخر، أكدت سلوى خطاب أنها يشغلها العمل الجيد، مضيفة: بقى لنا فترة شايفين إنتاج كويس ومخرجين مستواهم عالي، والمنصات بتقدم شغل مختلف مع ممثلين مستواهم عالي وهي المستقبل القادم، وأنا عن نفسي منبهرة بيهم، ومسلسل الليلة واللي فيها عجبني بشكل كبير وأداء كل طاقم العمل مثل زينة وسماح أنور وغيرهم.
وأشادت سلوى خطاب أيضًا بموهبة الفنانة منة شلبي ومنى زكي وريهام عبد الغفور، مؤكدة أن هناك بعض الفنانات لديهم موهبة عبقرية.
