فكري صادق يرد بعد تعرضه للهجوم: سعيد صالح زي كل ممثلين مصر ودي حقيقة ربنا.. إنما عادل إمام فالتة
علق الفنان فكري صادق، على الانتقادات اللاذعة التي تعرض لها بعد تصريحه الأخير عن الفنان سعيد صالح، وقال عنه: ممثل عادي وفيه زيه كتير.
وقال فكري صادق في أول تصريح له مع القاهرة 24، بعد الهجوم عليه: الهجوم اللي حصل ده لمصلحتي والناس مغايرة للحقيقة بتاعت ربنا، أنا قولت سلام يا صاحبي يعني عادل إمام، يعني لما سعيد صالح بيعمل فيلم لوحده بيكون مقاولات، وأنا عند رأيي إن سلام يا صاحبي يعني عادل إمام بس، حسن ومرقص كان عادل إمام وعمر الشريف سوا ولكن لما حد بيفتكره بيذكر عادل إمام بس.
واستكمل فكري صادق: سعيد صالح زيه زي جميع ممثلين مصر، إنما عادل إمام فلتة محصلش، ولا إسماعيل ياسين اللي كان بيصور فيلمين في اليوم وعماد حمدي بقوا نجوم 50 سنة زي عادل إمام، عادل تميز، لما بيقولولي سلام يا صاحبي قلت نجح بـ عادل إمام فقط، وممكن يكون في اختلاف في وجهات النظر.
ابنة سعيد صالح تعلق على تصريح فكري صادق
ومن جانبها علقت هند ابنة سعيد صالح على تصريحات فكري صادق، ونشرت على حسابها الشخصي بـ فيس بوك صورة لوالدها، وقالت: يا سيعا يا حبيبى يا روحي يا قلبي، لا هو يوم ميلادك ولا ذكرى وفاتك ولا عيد من العيدين المرتبطين مع الناس بالعيال كبرت ومدرسة المشاغبين.. جملة على لسان ضيف في برنامج اتقالت في سياق الكلام اللي أساسًا مكنتش طرف فيه لا من قريب ولا من بعيد، ولا حتى كنت في عنوان الفيديو، اتقلبت مظاهرة حب لـ سعيد صالح، ومش النهاردة بس، كل فترة ليك نفحة، فجأة ومن غير مناسبة، يا رب تكون من الناس اللي ينطبق عليهم من حبه ربه حبب فيه خلقه، ربنا يسعدك ويراضيك، وبالنسبالي أنا، اللهم لك ألف حمد وشكر، ربنا يرزقني ربع الحب ده، يا بختي بيك.
