أرملة سعيد صالح بعد تحركها قانونيا ضد فكري صادق: كلامه غير مهذب.. وتعمد جذب الأضواء | خاص
علقت أرملة الفنان سعيد صالح، على تصريحات فكري صادق الأخيرة بشأن الفنان سعيد صالح، معربة عن استيائها الشديد منه، مؤكدة أنها سوف تأخذ إجراءات قانونية عاجلة ضده خلال الفترة المقبلة.
وقالت شيماء فرغلي في تصريحات لـ القاهرة 24: هاخذ إجراء قانوني ضده وهنزل النهاردة أقابل المحامي، مش هينفع يتسكت على اللي حصل ده.
وتابعت شيماء فرغلي: كلامه غير مهذب عن النجم سعيد صالح، ده كلام ميصحش الراجل في دار الحق أنا موجودة وهعرف أوقف أي حد عند حده لأن سعيد صالح فنان عظيم وله أرشيف كبير جدًا فنيًا مش معقول الموضوع هيوصل لدرجة إنه يغلط فيه بالشكل ده.
وعن حديث فكري صادق حول إنه دوق ابنته المر، قالت شيماء فرغلي: أتمني ترجع أيامه ويرجع بيا الزمن علشان أعيش مع سعيد صالح لو أنا دقت المر هبقى عايزة أيامه ترجع تاني، هو يعرف منين هو كان عايش معانا، وانا لو دايقة المر هعيش معاه كلنا عارفين أن السعيد صالح بيحب يعيش اليوم بيومه.
وأضافت شيماء فرغلي: لو شاربة المر هسيبه وأمشي لأني لسه صغيرة وبنته كانت هتقول لا كنت مبسوطة وعايشة حياة سعيدة مع والدها.
وعن علاقة الصداقة التي كانت تجمعهما قالت شيماء فرغلي: لو كان صديقه كان هيتكلم عليه كده، هو مش صديقه الكلام ده ليس له أي أساس من الصحة عمره ما زارنا ولا مرة ولا أنا عمري شوفته، مجاش في حياتنا.
واستكملت حديثها قائلة: بيقول سعيد صالح بيحب الكوكايين أكتر من بنته يعنى بيغلط في النجم سعيد صالح وفي بنته وفي جمهوره، أي إهانة لسعيد صالح ولبنته هتبقى إهانة ليا، النقابة براحتها تاخد إجرائها زي ما هي عايزة، وأنا هاخد إجراء قانوني ضده.
وعن اعتذار فكري صادق لابنته هند سعيد صالح، أوضحت شيماء فرغلي قائلة: هو كان نايم وفجأة لقي نفسه قايل الكلام ده هو انت تغلط وتاني يوم تعتذر علشان أنت خايف يترفع عليك قضية هو أنت غلطت غلط عادي في أخطاء لا تغتفر أخطأ مينفعش تعدي كده.
واختتمت شيماء فرغلي: هو إزاي سعيد صالح مثال سيئ للشباب علشان دخل السجن علشان كان بيطلع يتكلم عن النظام، سعيد صالح علشان كان راجل فنان وسياسي وكان صريحا وكان واضح مش عارفة فين مشكلته مشكلته إنه مكنش عارف يواجه سعيد صالح على حياته فقرر دلوقتي الأضواء تتسلط عليه فبدأ يتكلم علشان الناس تاخد بالها منه.. دي مش إساءة عادية.
