بعد سجنها لتعذيب خادمتين.. وفاء مكي: ربنا له حكمة في اللي حصلي
علقت الفنانة وفاء مكي، على أزمة سجنها بتهمة تعذيب خادمتين، مشيرة إلى أن الله له حكمة في ذلك.
وقالت وفاء مكي في تصريحات تلفزيونية: عندي خدامات بيساعدوني دلوقتي في البيت.. والحكاية دي بقالها 20 سنة وأكتر، ولما حد بيتكلم بقوله دا موضوع ملهوش لازمة ولما بفتكر بقول إيه التهريج دا؟ وبضحك، ولكني اقتنعت أن اللي حصلي له حكمة يعلمها الله والضربة اللي مش بتقتل بتقوي.
كما تطرقت وفاء مكي للحديث عن سبب ابتعادها عن التمثيل، قائلة: ابتعدت عن التمثيل عشان كنت متفرغة لابني بعد ما جوزي مات.. ولكن أنا محتاجة أشتغل بردو لأن ظروف الحياة صعبة وعندي ابن محتاج فلوس ولكن الأجر حاليا مش على قد المستوى.
وواصلت وفاء مكي: كنت هتعاون مع محمد رمضان في فيلم جديد ولكن الأجر كان قليل ورفضت لأني ممثلة قديمة ومش لسه حد هيكتشفني.. ولو هنزل أشتغل وأتعب وأتفرغ لازم الفلوس تكون تستاهل أضحي عشانها.
وأضافت وفاء مكي: جه وقت كنت باخد أعلى أجر وكان ساعتها 5000 جنيه وكنت دائمًا أعلى نسبة بيع وتوزيع في المجلات والجرائد وزمان مكنش فيه الأجور العالية والملايين اللي بتتاخد دلوقتي، ومع ذلك أنا معنديش ثروة من التسعينيات ومعملتش حاجة بالفلوس.
وتطرقت وفاء مكي للحديث عن نجلها عمر، قائلة: أنا بضطر أصحى الفجر وأنام الساعة 11 علشان أروح المدرسة وارجع وأذاكر له، علشان أشتغل لازم أجيب وقت.. لكني ماعنديش الوقت ده، ابني مسؤول مني مسؤولية كاملة، علشان أجي البرنامج كل دقيقة تليفون لدرجة كنت هجيبه هنا، جاله بطولة فيلم وهو عنده 5 سنين وهو دلوقتي 12 سنة ولكنه رفض لأنه مبيحبش التمثيل وهو ما شاء الله قمور وشعره مسبسب، وفي المدرسة في حاله ومسمينه المحترم بس بيرازي فيا في البيت.
