رامي جمال عن المطرب النقاش: بسدد فيه ديون ناس ساعدتني في بداياتي.. ومش همضيه عقد احتكار
تحدث الفنان رامي جمال، عن المطرب النقاش أحمد سالم، مؤكدًا أنه لم يقدم الدعم له حتى يتصدر التريند كما يزعم البعض، ولكنه يدعم موهبته.
أحمد سالم فنان صوته أجبر العالم العربي إنه يحترمه
وقال رامي جمال، خلال لقائه في برنامج سهرانين، الذي يقدمه الفنان أمير كرارة، والمذاع عبر شاشة قناة ON: أحمد سالم فنان صوته أجبر كل العالم العربي إنه يحترمه، وفكرة دعمي ليه أنا استُفزيت للصوت، علشان فيه ناس بتقول دعمي لأحمد ليه سبب، ولكن أنا لما دعمته مكانش لسه حد يعرف الفيديو، وفيه ناس كتبت إني عايز أركب تريند، طيب اللي بيركب تريند بياخد حاجة نجحت أصلًا وبيتكلم عنها، لكن في وقت ما أنا نشرت الفيديو بتاع أحمد مكانش حد شاف الفيديو.
قلت لـ مراتي الصوت ده حرام لو معملتلوش حاجة
وأضاف رامي جمال، إن المطرب أحمد سالم لديه قبول كبير لدى الجمهور، قائلًا: أنا قُلت لـ مراتي ساعتها الصوت ده حرام لو معملتلوش حاجة، فقالتلي يعني براحتك بس حاول تتحكم في حماسك، قُلت بالعكس ده اللي زيه لازم أكون متحمس ليه، أصل الفنان إيه غير صوت وقبول؟ والقبول واضح من ساعة ما الفيديو نزل إن سبحان الله كمية الناس اللي شاركت الفيديو وقالوا صوته حلو، والصوت مفيش عليه نقاش، وهو الولد متوفر فيه الاتنين، فأنا هبقى غلطان لو مخدتش الدور ده في حياتي.
وتابع: أنا بسدد في أحمد ديون ناس عملتهالي وساعدتني، ودورنا في الحياة مش بس إنك توصل، ولكن فيه حد في طريقك ينفع تساعده وتوصله هو مش هياخد من رزقك حاجة، وده اللي هعمله مع أحمد إن شاء الله.
كما كشف رامي جمال، تفاصيل لقائه بالمطرب أحمد سالم، قائلًا: أنا قُلت لأحمد أول ما قعدت معاه أنا هعملك أغنيتين واحدة أنا وأنت وواحدة لوحدك، ومش همضيك عقد احتكار، مع إني هصرف على الأغنيتين مبلغ كبير جدًا، بس أنا بصرفهم وهما اتصرفوا عليا قبل كده، وأنا بسدد فيك دين عليا، ولو ربنا كتب قبول في الأغنيتين دول يبقى دي رسالة من ربنا إني أكملك لو أنت اخترت إنك تكمل معايا.
واستكمل: أحمد من دلوقتي الشركات عارضة عليه، ولكن هو فكر إني دلوقتي واحد من غير عقد وبعمله الأغاني بحب، ولقى الباقي كله عقود، وطيبته مخلياه مصدقني مقرر إنه يسيب نفسه في الأغنيتين اللي هعملهم ليه، وأنا بشيل هم فكرة إنك تدوق النجاح، وأحمد راجل وشقيان.
واختتم رامي جمال حديثه، مؤكدًا دعمه للمطرب أحمد سالم، قائلًا: سألت أحمد لو منجحناش هتعرف ترجع تشتغل تاني ولا لأ؟ أنا أقدر أشيل أحمد وأحط نفسي مكانه وأشيله لفترة، يعني لو قُلت إني هعمل الأغنيتين دول في 4 أو 5 شهور، وطول الفترة دي مصاريفك مسؤولة مني، بس لو منجحتش هتعرف تشتغل تاني؟ لقيت إجابته إجابة راجل شقيان، وقالي هرجع أشتغل عادي جدًا، ولحد ما أحمد يقف على رجليه أنا في ضهره.
