حبسني في أوضة 5 أيام.. ننشر أقوال نورا فتاة المعادي خلال التحقيقات بعد سجن والدها | خاص
قضت محكمة الجنايات بالتجمع الخامس بحبس شخص، عام، لاتهامه بخطف ابنته واحتجازها قرابة 5 أيام، في القضية التي اشتهرت بـ قضية نورا طالبة الأكاديمية البحرية - البالغة من العمر 23 سنة.
نورا فتاة المعادي
وينشر القاهرة 24؛ نص التحقيقات في واقعة خطف نورا فتاة المعادي، حيث مثلت الفتاة أمام جهات التحقيق، التي شرعت في سؤالها، وقالت الآتي: اللي حصل إن أنا من أم کورية وأب مصري، واتولدت في كوريا، وتقريبًا أنا جيت مصر من وأنا عندي 5 شهور، وكنت مقيمة مع جدي اللي هو عصام الدين، ومع زوجته إحسان، وهما اللي متولين رعايتي وكل أموري، وأبويا كان عايش في اليابان، وبينزل كل سنة مرة أو كل سنتين، وبشوفه في البيت لما بييجي يقعد مع جدي مرة ولا اتنين، في الفترة اللي هو موجود فيها، والأمور كانت ماشية تمام.
وتابعت فتاة المعادي: اللي حصل إني بعد ما خلصت ثانوية عامة أبويا كان عايز يدخلني كليه طب في اليابان، وأنا كنت رافضة وجدي كمان كان رافض، وحصل مشاكل بينه وبين والدي، عشان أبويا راح سحب الملف بتاعي من الأكاديمية البحرية في الإسكندرية، فساعتها جدي رفع عليه دعوى أسرة بضم حضانتي، والولاية التعليمية وده كان في 2018 تقريبا، وبعدين اتحكم لجدي بالولاية التعليمية وضم الحضانة ليه، وساعتها بابايا معملش حاجه وجدي ومراته هما اللي كانوا بيدفعوا مصاريف الجامعة، ومتكفلين بكل حاجه خاصة بيا، ومن الوقت ده مشفتوش لحد ما جدي اتوفى في 10 أكتوبر 2021.
وأضافت: بعدها في رأس السنة عرفت إن أبويا رجع مصر وكان قاعد في بيت مامته، وكنت بشوفه في أول شهر تقريبًَا يوم ويوم، والفترة اللي بعد كده بقيت بشوفه قليل جدا، وجالي في البيت فوق تقريبا كان تاني يوم العيد، ومرة تانية كده وبعدين هو جه في يوم 2 يونيو 2022 للبيت عشان يسأل عليا، وملقنيش ومرات جدي قالتله إني في فرح واحدة صاحبتي، وأنا فعلا كنت بايته عند صاحبتي، وتاني يوم كان فرحها، وخلصت الفرح ورجعت البيت.
وأردفت نورا - المختطفة من والدها بالمعادي: لقيت والدي جالي على الساعة 8:00 مساء تقريبا، وخبّط فـ مرات جدي فتحت، وبعدين سمعت زعيق، ولقيته جالي وأنا نايمة في الريسبشن، لقيته جاي يجبني من شعري وسحلني وضرب فيّ، ومرات جدي كانت عماله تصرخ وهو جرجرني على الشارع وفضل ماسكني من شعري وجرني من الشارع، وراح بيا على بيت مامته ودخلني الشقة بتاعته - اللي هي في الدور الأول، ولقيت في الشقة مراته اليابانية وولاده الاثنين ولد وبنت، وبعدين دخّلني أوضة وضرب فيا تاني جوه، وبعدين قفل عليا بالمفتاح.
واختتمت نورا، قائلة: يومها بالليل أنا فتحت الشباك بتاع الأوضة، ولقيت المسافة قريبة فنطيط من الدور الأول عشان أهرب منه، بس لما نزلت لقيت سور العمارة طويل ومعرفتش أطلع منين ولقيته نزلي، وعشان سمع صوتي؛ راح ضاربني ومطلعني تاني وقافل الشباك بمسامير، وقفل عليا الباب ثاني، ومن ساعتها وأنا في الأوضة مش معايا أي حاجة، ولا تليفون ولا أي وسيلة أقدر أتواصل بيها مع حد، واللي كان بيدخلي الأكل هي مراته، ولما كنت ببقي عايزة أدخل التواليت، کنت بخبط على الباب عشان يفتحولي وفضلت كده 5 أيام تقريبا، وبعدين بدأ يقولي إن ممكن أنزل أتحرك في البيت، وأخش التواليت عادي، أو المطبخ، وطبعا كان لازم بيبقى في حد صاحي في البيت لحد النهاردة.. لقيت عمي محمد جه، ودخل عليا وقالي إنه هيوديني النهاردة بيتي، وإن كل حاجه هتتحل بس بشرط إني آجي النيابة، وأقول إن محصلیش حاجة، وإني مش بتهمه، وطبعا أنا قلتله تمام عشان بس أخرج وجابني هنا.
كانت محكمة جنايات القاهرة، المنعقدة بالتجمع الخامس، أمس الخميس، برئاسة المستشار وجيه حمزة شقوير، قد قضت بالحبس سنة للأب المتهم بالاعتداء على ابنته المعروفة إعلاميًا بـ نورا فتاة المعادي، وخطفها واحتجازها، طمعًا في ميراثها من جدها.
