تأجيل محاكمة المتهمين في قضية الزوج المنتحر ببولاق الدكرور لـ5 أكتوبر
قررت محكمة جنايات جنوب القاهرة، المنعقدة بزينهم، تأجيل أولى جلسات محاكمة سامية.ع وشقيقتها بدور، وهلال.ا، بتهمة قتل زوج الأولى وتعذيبه في بولاق الدكرور، إلى جلسة 5 أكتوبر الجاري؛ للمساعدات الفنية.
قتل زوج وتعذيبه
وخلال تحقيقات النيابة العامة، قالت سامية. ع، المتهمة بقتل زوجها رفقة عشيقها بعد تعذيبه: عشيقي كان ييجيكل يوم يقعد معانا ويجيب الحشيش ونشرب أنا وهو وهيثم زوجي، وحصلت مشكلة بيني وبين زوجي هيثم عشان والدته كانت عايشه معانا في الشقة، وسبت البيت وسافرت الإسماعيلية أنا وأختي عشان نجيب شقة، بس الفلوس اللي معانا ماكنتش مكفية، فرجعنا أنا وأختي تاني باتفاق إن هيثم يعاملني كأب فقط دون معاشرة زوجية، وهو كان عايز يعاشرني واتفقنا إن هلال ييجي ينام معانا على السرير وأحط مخدة بيني وبين هلال في النص، وأنا كنت بقول لهيثم أنا أضمن هلال ومش ضمناك أنت، وكنت بنام على الطرف وهيثم بينام في الطرف وهلال كان بينام معانا في النص، واستمر الموضوع ده 3 أيام.
وأكملت الزوجة المتهمة: بعد كدة جالي هيثم وقالي بنتي ادتني كشاف على عيني، وقلتله إزاي يا هيثم فقال إن بنتى بتقولي ازاي هلال ينام بينكم ومعاكم في النص، وقلت له إزاي البنت تقول كده دي عمرها ما تدخلت بينا في حاجة.
استكملت الزوجة: فضلت أقوله احلف بالطلاق وهو كان رافض يحلف بالطلاق، وفضلت أستفز فيه لحد ما قال عليّ الطلاق أنا مقلتش لبنتي على حاجة، فأنا قلت له خلاص ماشي، وأنا قلت لبنتي أنا غضبانة منك عشان إنتي بتكدبي قالت لي إن باباها اللي قالها تقول كده، وفجأة دخل جوزي هيثم علينا وكان مخضوض، وقلتله كده أنا محرمة عليك وأنت نزلت من نظري يا هيثم عشان أنت كداب وبتكدب وحلفت بعرض بنتك كدب وبالطلاق كدب، وأنا صممت على الطلاق وهو كان بيقولي أهم حاجة النية، فقالي إنتي لازم عشان أطلقك تتنازلي عن العيال وتدفعي مصاريف المأذون وملكيش حاجة في الشقة، قلت له إزاي أنت كده بتموتني وأنا عايشة هو عشان تطلقني لازم تعمل كده، وكان هلال واقف في المشكلة دي وهيثم قالي انتي عايز تلففيني حوالين نفسي تاني، وتم اتخاذ الإجراءات اللازمة.
