طردونا من بيتنا وإحنا تحت السن.. شاب يتهم أعمامه بنهب ميراثهم من والده.. والأم: هددوني عشان أتنازل
اتهم شاب يدعى أحمد ماهر، من مركز البداري بمحافظة أسيوط، أعمامه بنهب إرثهم من أبيهم بعد وفاته في حادثة سير عام 2017، حيث يزعم أن أشقاء والده طردوهم من منزلهم.
شاب يستغيث من بطش أعمامه
يقول أحمد ماهر لـ القاهرة 24: رابع يوم عيد الأضحى الماضي، تهجم علينا أعمامي في بيتنا بالسلاح الآلي، وطردونا تحت التهديد منه، ولكننا تقدمنا ببلاغ ولكن تم حفظه في مركز الشرطة.
ويدعي الشاب أن عمه يستغل نفوذه بالتستر على أشقائه، مؤكدا أنه في أحد الأيام بعد طرده من المنزل، عاد لفصل الأجهزة الكهربائية، ولكنه تفاجأ بأنهم غيروا مفتاح الباب الرئيسي، وبعد كسر باب المنزل، اتهم أعمامه بمحاولة التعدي عليه رفقة إخوته.
وأكمل: من رابع يوم العيد وإحنا بره بيتنا ومحدش عارف يحل معاهم، وكل محامي نوكله يشتروه لصالحهم، وأنا وأخويا تحت السن القانوني.
الأم تتنازل عن المحضر بعد التهديد
في حين تقول والدة أحمد ماهر: إخوة زوجي قفلوا الباب رابع يوم العيد، ومن وقتها وإحنا واخدين شقة للإيجار، وبناتي هما الكبار، أما الولاد تحت السن القانوني.
وأضافت لـ القاهرة 24: مثبوت في المجلس الحسبي 6 قيراط لينا ودور في الفيلا، رغم أن ورثنا 9 قيراط، وعملوا كده بعد حادثة جوزي على طول وأنا كنت معاه في الحادثة فمكنتش مركزة معاهم.
وأفادت الأم: الأرض لينا على الورق، مش استخدمناها خالص، أما البيت اللي خدنا المفتاح وكنت بروح في الإجازات بقعد فيه، بس دلوقتي قفلوا الأبواب من بره، وأنا مقدمة 3 بلاغات - 2496 إداري، 3779 إداري، 5702 جنح - وعايزة أدخل بيتي، ولو هياخدوا الأرض ويقبلوها على نفسهم بس عايزين ندخل بيتنا بدل الإيجار والمرمطة.
وأكملت الأم: اعتدوا على أولادي وعملت كشف طبي وخدوا حكم شهر وغرامة ويوم الجلسة هددوني للتنازل وعشان عيالي دخلت الجلسة وقلت إننا اتصالحنا.
