المخرج عمر عبد العزيز: مفيش فيلم مصري يستحق الترشح للأوسكار.. بقالنا 10 سنين بنشوف تهريج
تحدث المخرج عمر عبد العزيز، عن تكريم الراحلين سمير غانم ودلال عبد العزيز، في الدورة الـ 38 من مهرجان الإسكندرية السينمائي لدول البحر المتوسط، والذي بدأت فعاليات حفل افتتاحه منذ قليل بمكتبة الإسكندرية.
وقال عمر عبد العزيز، في حواره مع القاهرة 24، على ريد كاربت مهرجان الإسكندرية السينمائي: أنا سعيد جدًا بتكريمهم وطبعًا حزين لرحيلهم، ودلال من أول ما اشتغلت معايا في فيلم يا رب ولد سنة 1981 لغاية ما رحلت كانت علاقتي بيهم وبالأسرة كلها علاقة عظيمة، وأنا خسارتي كبيرة في دلال عبد العزيز وسمير غانم وسمير صبري، ربنا يرحمهم.
كما تحدث عمر عبد العزيز، عن عدم ترشيح الأفلام المصرية لجوائز الأوسكار، قائلًا: منستحقش إننا نترشح للأوسكار، لأن الأفلام اللي بتروح الأوسكار لازم تكون بتعبر عن المجتمع، وبقالنا 10 سنين بنشوف أفلام ضرب يا كوميديا وأنا أسف إني بقول كوميديا دي أفلام تهريج، ولما يكون فيه فيلم جد هيروح وده مش عيب، الناس فاكرة إننا بنبعت أي فيلم وخلاص، لأ لازم الفيلم يعبر عن جو البلد اللي جاي منها.
أما عن الحلول المقترحة لإصلاح صناعة السينما، أضاف عبد العزيز: إحنا في مرحلة انتقالية، كنا بنعمل 120 فيلم دلوقتي بنعمل 18 فيلم، إحنا محتاجين حاجات كتير زي إنتاج أكثر وشركات أكثر، وكان زمان فيه 3 نوعيات من الشركات مفيش ده دلوقتي.
مهرجان الإسكندرية السينمائي
وقررت إدارة مهرجان الإسكندرية السينمائي لدول البحر المتوسط، تكريم الفنانة دنيا سمير غانم، ضمن فعاليات الدورة الـ 38، كما سيتم تكريم النجمة الفرنسية ماريان بورجو في حفل الافتتاح، بحضور وزيرة الثقافة ومحافظ الإسكندرية وعدد من نجوم السينما المصرية والعربية والأوروبية.
