مخرجة زمن السلطان تنشر خطابًا من سجين لـ سعيد صالح |صور
كشفت المخرجة روجينا بسالي، كواليس تحضيرها أحد الأفلام التسجيلية بعنوان زمن السلطان عن الراحل سعيد صالح، مشيرة إلى أنها أخذت من ابنته هند مقتنيات خاصة بالراحل، والتي وجدت بها حوابات لمواطنين كانوا يرسلون له شكواهم لمساعدتهم.
وكتبت روجينا بسالي، عبر حسابها بموقع فيس بوك: وأنا بحضر فيلم سعيد صالح أخدت من هند السنة اللي فاتت الحاجات اللي عندها كلها، ووسط الحاجات دي لقيت ظرف مكتوب عليه مطالب من سجناء، الظرف مليان جوابات من مواطنين عاديين بعتوا طلباتهم لسعيد صالح، والمفاجأة إنهم كانوا بيتعاملوا معاه على إنه وزير الداخلية مثلًا وكانوا بيطلبوا مطالب مهولة ولا تتخيلها.
وأضافت: الجوابات دي استمر إرسالها بعد خروجه من الحبس بوقت مش قليل، وفيهم جواب مبعوت للرئيس مبارك شخصيًا ومطلوب منه يوصله ويتوسط لهم، الملفت اهتمام سعيد صالح لدرجة إنه قرأ بعناية شديدة كل الجوابات وكان عنده ملاحظات وتوقف عند جمل بعينها في الجوابات دي، وعندي يقين إنه حاول في بعض الحالات حتى لو بلا نتيجة لكن المهم إنه تعامل بجدية مع ناس شافت فيه أمل لحل مشاكلهم.
واستكملت: متخيل حد الناس ارتبطت به للدرجة دي؟! طب متخيل إن الناس كانت حاسة بقيمته لدرجة إنهم يقدموا له مظالم ومطالب وهو سجين وإيده مربوطة زيه زيهم؟! متخيل إنه كان مهتم يقرأ ويكتب ملاحظات مع العدد ده من مشاكل الناس؟ حتى وهو عارف إن ما باليد حيلة!. مش سهلة أبدًا الحالة اللي عملها والحب اللي كمل لحد النهارده.. حكاية نجم كبير ومهم حكايات زمن بحاله زمن السلطان.
