حميد الشاعري لـ عمرو مصطفى: أمسك نفسك واحترم فرق التاريخ والسن بينك وبين عمرو دياب
وجه الفنان حميد الشاعري رسالة للملحن عمرو مصطفى بسبب خلافه مع عمرو دياب، بجانب الحديث عن انتشار المهرجانات الشعبية ورأيه في الراب.
وقال حميد الشاعري في تصريحات تلفزيونية: مبحبش أتدخل في المشاكل لأن عمرو مصطفى وعمرو دياب صحاب من 20 سنة، وبقول لـ عمرو مصطفى أمسك نفسك شويةـ أنت طيب أوي واللي في قلبك على لسانك، بس مينفعش ولازم تعمل حساب فرق التاريخ والسن بينك وبين عمرو دياب.
وعن انتشار المهرجانات الشعبية والراب، قال حميد الشاعري: أنا متقبل المهرجانات والراب بطريقة كبيرة وبحبهم لأنهم مختلفين ودا أهم شيء والتنوع الموسيقي حلو، وعملت أغنية راب مع مروان موسى، ولازم نخلي الشباب يبدعوا وأنا ضد المنع لأن الحاجة الحلوة هتسمعيها معجبتكيش ممكن تقفليها والموضوع بسيط.
حميد الشاعري: المهرجانات هي تطور للأغاني الشعبية
وواصل الشاعري: المهرجانات هي تطور للأغاني الشعبية، وأي شكل غنائي جديد في البداية الناس مش هتستوعبه ودا طبيعي، ومفيش حاجة اسمها أسوأ لحن أو أسوأ أغنية بالعكس لازم نحاول نفهم الأغنية رسالتها إيه؟ زي أغنية حدوتة مصرية لمحمد منير عبارة عن خبط بس ومفيش لحن ومع ذلك الفكرة عجبتني جدا وكانت رائعة.
وسبق وقال حميد الشاعري إن محمد منير هو أول صديق له في مصر، وكان يسمعه منذ صغره وقبل مجيئه لمصر وعندما اقترب منه أحب شخصيته وأصبحا أصدقاء مقربين.
