مطرب المهرجانات مسلم بعد اعتزاله: أنا تعبت نفسيًا.. مش قادر اشتغل وحد بياكل حقي |خاص
كشف مطرب المهرجانات مسلم كواليس قرار اعتزاله، وذلك بعدما كتب عبر حسابه على إنستجرام، أن مجال الفن لا يناسبه.
وقال مسلم لـ القاهرة 24: أنا اعتزلت لأني تعبت نفسيًا، وهرجع لما أكون حر وأخلص قضيتي مع المنتج سلطان، لأن فيه عقد بينا 8 سنين وهو مش بيديني فلوسي وناصب عليا، وأنا مش قادر اشتغل وحد بياكل حقي، وأتمنى أنتج لنفسي وربنا يكرمني.
وواصل مسلم: أنا فاهم إني وصلت لمنطقة كويسة عند الجمهور وأنا سايب باب للعودة بس لما هحس إني حر وهخلص قضيتي وهرجع للغناء تاني، وكمان موضوع نقابة المهن الموسيقية هيتحل وأنا حاليا رافع قضية على المنتج سلطان وربنا هيكرمني.
وسبق وقال مسلم في مقطع فيديو عبر حسابه بموقع انستجرام: أنا مش فارق معايا الفلوس بس حرام يكون فيه عقد بيني وبين سلطان الشن إن الأرباح تتقسم علينا 50% وفي الآخر أخد 10 آلاف في أغنية خطر وأخد 20 ألف في أغنية يا أصفر اللي كسرت الدنيا.
مسلم: قصدت إثارة الجدل في أغنية جوب.. ولم أروج للمخدرات
وسبق وتعرض مسلم لحملة حادة من الانتقادات بعدما اتُهم بالترويج للمخدرات في أغنية جوب، بسبب جملة أنا جوبك صاحبك وحبيبك، ضمن كلمات الأغنية، ولكن أكد مسلم في تصريح سابق لـ القاهرة 24 إنه قصد إثارة الجدل بالأغنية ولكنه لم يروج للمخدرات بل حذر الشباب من خطورتها.
