والدة سيلين طفلة الضمور العضلي تكشف آخر تطورات حالتها الصحية: من سيئ لأسوأ.. وفاضل 7 ملايين جنيه لإنقاذها
كشفت رضوى حمدي، والدة الطفلة سيلين أيمن المصابة بالضمور العضلي الشوكي، آخر تطورات حالتها الصحية، مؤكدة أنه متبقي من المبلغ الكلي لشراء الحقنة الأغلى في العالم 7 ملايين جنيه.
فاضل 7 ملايين جنيه
وقالت الأم في تصريحات خاصة لـ القاهرة 24: سيلين حالتها متدهورة جدًا، ومحجوزة في المستشفى، وكل يوم من سيئ لأسوأ، و محتاجة علاجها في أسرع وقت قبل ما تدهور أكتر، مشددة على أنه تم جمع 33 مليون جنيه، حتى الآن، ومتبقي 7 ملايين جنيه، لشراء حقنة الضمور العضلي، المقدر تكلفتها 40 مليون جنيه.
آخر تطورات سيلين الصحية
وتابعت: الدكاترة قالوا إن حاليًا مفيش التهاب رئوي الحمدلله، لكن بيحافظوا جدًا على نفسها، عشان شروط الحقنة، أنها تاخدها وهى صحتها كويسة، ومتكونش على جهاز تنفس.
وأوضحت رضوى: ممكن تعمل جلسة كل يومين، والدكاترة كلهم متابعين حالتها يوم بيوم عشان يحافظوا على استقرار حالتها شوية، لكن للأسف كل يوم من سيء لأسوأ، منوهة: بيقولولنا لازم نلحقها ضروري جدًا.
وواصلت: سن الحقنة بيختلف من طفل للتاني، وحالة سيلين كان لازم تاخدها قبل ما تكمل سنة، بس ربنا هيسهلها أن شاء الله أنا متأكدة عدى كتير، واللي باقي القليل خلاص.
وأكدت أن حالة سيلين أصعب من حالات رقية وعلياء وفريدة، نظرًا لتدهورها السريع والمستمر، مضيفة: هي حاليًا ماشية على الأدوية باستمرار.
