والدة طفل تعرض لخطأ طبي: الدكتور قاللي إنه غلط وهو بيعمل العملية بجهاز الكي وحصل حريق في العضو الذكري| تحقيقات
يواصل القاهرة 24 نشر التحقيقات في القضية التي حملت رقم 6437 لسنة 2022 إداري المعادي، في واقعة اتهام سيدة تدعى ياسمين، أحد الأطباء ويدعى ج. ف، استشاري الجراحة والمناظير مالك أحد المستشفيات بمنطقة المعادي، بالإهمال الطبي، وذلك أثناء إجراء عملية ختان لنجلها علي خالد؛ لتسببه في حرق عضوه الذكر والخصية؛ مما أصابه بعاهة مستديمة.
سيدة تتهم طبيب بإصابة نجلها بعاهة مستديمة بمستشفى خاص بالمعادي
وإلى نص التحقيقات:-
أسمي: ياسمين سعيد أحمد محمود محمد.
س: ما تفصيلات شكواك تحديدا ؟
ج: اللي حصل ان ابني على 6 سنوات مكانش لسه عمل عملية الطهارة لعضوه الذكرى فتواصلنا مع الدكتور ح. ش باعتباره طبيب النساء اللي كان عامل ليا عملية الولادة، وهو صاحب المستشفى اللي عملنا فيها العملية المعادي علشان تعمل عنده عملية الطهارة في المستشفى وتم تحديد يوم 2022/9/7 لإجراء العملية، وروحنا بابني اليوم ده المستشفى واللي عمله العملية هو الدكتور ج. ف فؤاد وبعد دخول ابني العمليات فوجئت انه اتأخر جدا وفضل في العمليات أكثر من ساعه والمفروض ان عملية الطهارة مش بتاخد كل الوقت ده لحد ما خرج من غرفة العمليات وقاللي انه غلط وهو بيعمله العملية بجهاز الكي وحصل حريق في العضو الذكري والخصية.
س: ما سبب ومناسبة تواجدك في الزمان والمكان سالفي الذكر ؟
ج: تحديد ميعاد العملية ده من الدكتور ح. ش وروحنا في الميعاد المحدد.
س: ما هو اسم نجلك تحديدا ؟
ج: على خالد على.
س: وكم يبلغ عمر تجلك تحديدا؟
ج: هو عنده ست سنوات.
س: وما هي الحالة التي كان عليها نجلك حال دخوله المستشفى تحديدًا ؟
ج: هو كان كويس جدا لإن العملية هي عملية طهارة عادية جدا هما بس قالوا لينا انه يكون صايم.
س: ومن القائم بإجراء العملية لنجلك ؟
ج: هو الدكتور ج. ف ومعرفش باقي اسمه.
س:وما هي طبيعة تلك العملية ؟
ج: أنا مكنتش أعرف اذا كانت جراحه ولا منظار لكن الدكتور قال بعد العملية انه كان بيعمله العملية بطريقة الكي.
س: ألم يخبرك بذلك قبل إجراء العملية ؟
ج: لا احنا روحنا علشان نعمله عملية طهارة عادي جدا.
س: هل كان نجلك يعاني من ثمة أمراض حال إجراء العمليه له ؟
ج: لا مش بيعاني من أي أمراض.
س: وهل تم تخدير تجلك حال إجراء العملية له ؟
ج: ايوه تم تخديره تخدیر کلی.
س:الم يخبرك الطبيب مجرى العملية لنجلك بإمكانية حدوث أية مضاعفات جراء تلك العملية ؟
ج: لا.
س: وما هي مدة مكوث نجلك بغرفة العمليات حال إجراءه العملية ؟
ج: هو فضل أكثر من ساعة بس المفروض العملية دي مش بتاخد كل الوقت ده.
س: وكيف نمي إلى علمك وجود خطأ طبي من الطبيب حال إجراء أعملية لنجلك ؟
ج: لأنه خرج بعد أكثر من ساعة من العمليات وقالي كده.
س: وما الذي أبلغك به تحديدًا ؟
ج/ هو قاللى انه غلط وهو بيعمله العملية بجهاز الكي وحصل حريق في العضو الذكري والخصية عند ابنى على بسبب الخطأ.
س: وهل من ثمة إجراء طبي اتخذه الطبيب عقب إجراء العملية لنجلك ؟
ج: لا هو معملش أي حاجه ثانية غير انه جاب بعض الاستشاريين بصوا على حالة على وواحد فيهم أوصى أنه ياخد جلسات اوكسجين علشان يزود ضخ الدم في الاوعية الدموية علشان متموتش وتسبب مشكلة بعد كده.
س: ما هي طبيعة ذلك الحريق ؟
ج: هو حريق من الدرجة الثالثة.
س: وكيف وفقتي على ذلك ؟
ج: لان هو لسه بيتابع حالته.
س/ ومتى توجه نجلك لإجراء جلسات اوكسجين ؟
ج: روحنا يوم 2022/9/18 وكان معانا الدكتور اللي عمل العملية.
س: وما هو التشخيص المبدئي لحالته أنذاك ؟
ج: هما قالو ان ده حريق من الدرجة الثالثة في العضو الذكر والخصية وبسيه حدوث خطا من الدكتور اللي عملكم العملية، وكمان قالوا ليا ان مش هنقدر نعرف إذا كان هينتج عنه عاهة مستديمة تؤثر على قدرته الجنسية فيما بعد ولا لا، بس هما قالوا انه ممكن يسبب له عاهة مستديمة.
س: وهل من ثمة تقارير طبية أثبت بها ذلك التشخيص ؟
ج: أيوه في تقرير بس قالوا لينا انهم لازم خطاب من جهات التحقيق علشان يسلموا لينا التقرير.
