شاب يبيع طبق الفاكهة بـ5 جنيهات: هدفي المساعدة وليس الربح.. وأكتر من مكان رفض يشاركني لأن المكسب قليل | صور
هدفي أي حد يقدر يشتري الطبق بتاعي حتى لو طفل صغير.. فكرة بسيطة قرر أن يطبقها شاب سوهاجي يدعى محمد يسري، يبلغ من العمر 22 عاما، وهي بيع طبق فاكهة متنوع بسعر رمزي كي يستطيع أي شخص شرائه.
شاب يبيع طبق الفاكهة بـ 5 جنيهات
يقطن محمد بقرية المراغة بمحافظة سوهاج، ومع ارتفاع تكاليف المعيشة على معظم المواطنين، قرر تنفيذ فكرة طبق الفاكهة بـ 5 جنيهات، رغم أن الربح قليل جدا، إلا أنه مستمر فيها منذ أسبوعين تقريبا.
يقول محمد لـ القاهرة 24: لم استكمل تعليمي، وأعمل باليومية في أكثر من مجال، لذا حينما شاهدت هذه الفكرة المنفذة في منطقة أخرى عبر موقع التواصل الاجتماعي فيسبوك، نويت تجربتها، بحيث يستطيع أي شخص شراء الفاكهة، فقررت الوقوف أمام المدرسة في أول يوم بكمية مناسبة، ثم انتقلت إلى الكورنيش ليلا، ووجدت إقبالا جيدا على الشراء.
يضيف الشاب العشريني: الفكرة محدش عملها في المنطقة قبلي، لأن الربح قليل جدا، ولما عرضت الفكرة على أكتر من فكهاني أو سوبر ماركت، محدش رضي بيها، لأن الطبق ربحه حوالي 30 قرش، ولا يتعدى النص جنيه.
وأكد أن هدفه ليس الربح، بل مساعدة الناس، لذا فهو سيستمر في تنفيذها، مشيرا إلى أن الطبق اقتصادي، وبقدرة أغلب الأشخاص شرائه: الطبق فيه عنب وموز وتفاح.
هدفي المساعدة وليس الربح
وتابع: ردود الأفعال كانت إيجابية جدا على الفكرة، وكل الناس حبتها ودعموني، وفي ناس من مجلس المدينة ومحامين دعموني، ومدير مدرسة كمان دعمني، وكمان الأطفال الصغيرين بيفرحوا، لأني بحط واحدة طوفي أو بونبوناية فيه عشان أفرح الطفل.
وأكمل يسري: أول يوم مدرسة أولياء الأمور اشتروا مني، وبعدها الأطفال بقوا يشتروا كمان، لأن أهلهم اطمنوا إن حاجتي نضيفة، لأني بحط الفاكهة مغسولة ونضيفة على الأكل على طول.
واختتم حديثه قائلا: في ناس فقيرة بتقابلني في الشارع مش معاها الخمسة جنيه تشتري الطبق، وكمان في أطفال مصروفها أقل من 5 جنيه، وزي ما في ناس شايفاه رخيص جدا، برضو في ناس شايفاه غالي عليها.
