مرتضى منصور: فيريرا قالي كفاية صفقات.. وعمرو السيسي موّت نفسه عشان يلعب في الزمالك
تحدث مرتضى منصور رئيس نادي الزمالك، عن التعاقد مع عمرو السيسي لاعب طلائع الجيش، قبل دقائق من غلق باب قيد الانتقالات الصيفية.
تصريحات مرتضى منصور
وقال مرتضى منصور في فيديو تقديم عمرو السيسي: عمرو السيسي مسمار خط الوسط، ومستر فيريرا قالي كفاية صفقات بس أنا قولت ده زيادة وهو موّت نفسه عشان يلعب في الزمالك، وبعتلي رسالة قالي مستعد أتنازل عن أي مبلغ عشان ألعب في الزمالك.
وأضاف رئيس نادي الزمالك: كفاية إنه اسمه السيسي دي حاجة من ريحة الرئيس، وبقوله مبروك وقع لمدة 4 سنوات، وإضافة لزملائه في نصف الملعب اللي كان أضعف خطوطنا بقى أقوى الخطوط.
واستكمل مرتضى منصور: اللي بيبعتلي يقولي ده الأهلي غلب الاتحاد المنيستيري في ملعبه بدون صفقات بقوله عيب ده كان ماتش مسخرة لو الفريقين قعدوا 3 أيام يلعبوا محدش كان هيجيب أهداف إلا بالهدف اللي جه ده، وببارك طبعا للأهلي عشان بيمثل مصر.
وواصل مرتضى منصور: كنت أرغب في التعاقد مع عبدالله السعيد ولكن سالم الشامسي مالك النادي أكد أن اللاعب من أصول النادي ولن يرحل.
واختتم مرتضى منصور: اسألوا الأندية الثانية فين الصفقات، إحنا عملنا 11 صفقة من أقوى اللاعبين في مصر، ما فيش مادي جاب النوعية دي من الصفقات.
من جانبه، قال عمرو السيسي، لاعب الزمالك الجديد: أشكر مرتضى منصور، هو كافح عشان أكون في نادي الزمالك، وهشرفه إن شاء الله وسعيد للغاية بوجودي في هذا المكان، وأتمنى التوفيق في القادم.
