معملتش حاجة غلط وكانت هتجيلي جلطة.. أول تعليق من نبيلة الحلواني بعد تعرضها للهجوم
ردت البلوجر نبيلة الحلواني على الهجوم الشديد الذي تعرضت له خلال الفترة الماضية، وذلك بعد فيديو نشرته تنتقد فيه أفعال بعض الطلاب في أول يوم جامعة.
أول تعليق من نبيلة الحلواني بعد تعرضها للهجوم الشديد
وتقول نبيلة التي تدرس بالفرقة الثانية بكلية اللغة العربية، بجامعة الأزهر: كان قصدي بالفيديو المنتشر إني انتقد بعض الأفعال في أول يوم دراسي وليس قصدي انتقاد الأشخاص أنفسهم، وكان الانتقاد بأسلوب هزار زي أي بلوجر.
وأضافت الحلواني في تصريحات خاصة لـ القاهرة 24: مكنتش متوقعة الهجوم ونزلت فيديو اعتذار وتعرضت للهجوم عليه برضو، ثم نزلت فيديو تاني وكان فيه هجوم ونفسيتي تعبت.
وتابعت: أنا نفسيتي تعبت ومتعودتش أتهاجم بالشكل ده، وأنا شخص محبوب بين زمايلي.. الناس اتنمروا على شكلي وأسلوبي ولبسي، وكانت هتجيلي جلطة بسبب الهجوم لولا تدخل أهلي وصحابي، وفقت ودلوقتي بقيت أفضل.
وأكملت: قبل كدة عملت فيديو بنصح فيه البنات بتوع أولى جامعة في حاجات متجيبوهاش، وكان عليه هجوم بس مش تريند، وبعدين عملت الفيديو ده بهدف انتقاد الأفعال مش البنات، بس بهزار.
نبيلة الحلواني ترد على المنتقدين
وتستكمل الحلواني حديثها مع القاهرة 24 قائلة: في ناس طعنت في عرضي، ودول مش مسامحاهم، وحسبي الله ونعم الوكيل فيهم، وفي ناس هاجمت فاكريني بتنمر على الطلاب، ودول بقولهم بعتذر على سوء الفهم، ومن حق كل شخص يقول رأيه ويحترم بس يحتفظ بيه لنفسه، مؤكدة: أنا معملتش حاجة غلط.
واختتم حديثها قائلة: بقالي حوالي 3 سنين بقدم المحتوى بس اتعرفت من حوالي سنة ومكنش انتشار واسع، وفي الأول كانت فيديوهات عادية وهزار عشان بحب أعمل فيديو، وفي ناس اتريقت عليا وقالوا مفيش محتوى، فقررت أعمل محتوى باقتراح صحابي للبنات اللي حابة تغير لبسها للأفضل من حوالي 5 أشهر والفيديوهات كانت عادية نصائح لأني بعرف اتكلم بين صحابي.
