سوما عن أسباب دعمها لمصطفى حلمي في انتخابات الموسيقيين: عايز يخلي النقابة كلها مميكنة
توجهت الفنانة سوما، لـ مقر نقابة المهن الموسيقية، لدعم زوجها المايسترو مصطفى حلمي، في انتخابات مقعد النقيب.
وتحدثت سوما، عن ترشح المايسترو مصطفى حلمي، خلال لقائها مع القاهرة 24، قائلة: شهادتي مجروحة ومش أنا اللي هتكلم عن مصطفى حلمي، طبعًا هو غني عن التعريف ووالده كان نقيب الموسيقيين لمدة 3 دورات ورا بعض، وقدم حاجات كتير جدًا للنقابة، مصطفى حلمي شخص مجتهد ودارس ومتربي في البيت اللي فيه نقابة تقريبًا.
سوما تدعم زوجها مصطفى حلمي في انتخابات نقابة الموسيقيين
أما عن دعمها لـ زوجها مصطفى حلمي في انتخابات النقابة، فعلقت قائلة: دعمي ليه لأني شايفة إن فيه فكر جديد عنده وفيه حاجات ممكن تطور كتير في النقابة، وفكرة دعم الشباب ووجودهم ممكن يضيف حاجة جديدة لنقابة الموسيقيين، وأنا بحترم كل الزملاء، وأنا على علاقة شخصية طيبة جدًا بيهم، وبتمنى الخير قبل كل شيء.
وأضافت: أكتر حاجة بتميز مصطفى حلمي، وبتخليني في ضهره أكتر إنه لما بيطلع خطوة بيكون عايز يطلع اللي بعدها، وده حماس الشباب اللي بيكون موجود اللي إحنا بنقول عليه، والحماس ده مش موجود من فراغ هو دارس الخطوة دي، وهو عايز يخلي النقابة كلها مميكنة.
انتخابات نقابة الموسيقيين
ومن المقرر أن تستمر انتخابات النقابة حتى الساعة الخامسة مساء اليوم، ليتم بعد ذلك فرز الأصوات، والإعلان عن النقيب الجديد للموسيقيين، الذي يخلف الفنان هاني شاكر بعد أن انسحب الأخير من مقعد النقيب، إثر أزمة مؤتمر حسن شاكوش، مع الإيقاعيين.
