المطربة سوما تكشف سر غيابها عن الساحة الفنية: بقالي 9 سنين تعبانة | خاص
كشفت المطربة سوما سر غيابها عن الساحة الفنية طوال الفترة الماضية، مؤكدة أنها ستعود قريبًا للساحة من جديد.
وقالت سوما، خلال لقائها مع القاهرة 24، أثناء تواجدها بنادي نقابة المهن الموسيقية، للإدلاء بصوتها في انتخابات النقابة، إنها تعرضت لوعكة صحية خلال الفترة الماضية، قائلة: كل الناس كانت تعرف إني تعبانة جدًا، وتعبي مش من السنة اللي فاتت بس، أنا على مدار 9 سنين كنت تعبانة وللأسف السنة اللي فاتت بس كان الوضع فيها سيئًا جدًا، تقريبًا كنت بين الحياة والموت.
وتابعت: الحمد لله بدعوات الناس وقدرة ربنا أنا في مراحل الشفاء وربنا يتممها على خير وأرجع تاني قريب، وبتأكد بس من خطواتي الصحية علشان لما أظهر مغبش تاني، ده مهم جدًا بالنسبة ليا.
وأكدت سوما خلال حديثها، أنها خرجت من وعكتها الصحية بسبب دعوات محبيها، قائلة: دعوات الناس اللي بتحبني أكتر حاجة وقفلتي، ودي أكتر حاجة خدتها من فني وحب الناس اللي لا يُقدر بـ أي ثمن.
سوما تدعم زوجها مصطفى حلمي في انتخابات الموسيقيين
وحرصت الفنانة سوما، على دعم زوجها المايسترو مصطفى حلمي، في انتخابات نقابة الموسيقيين، والتي يتنافس فيها أمام الفنان مصطفى كامل، والدكتور علاء سلامة، والموسيقار شريف حمدي.
وتحدثت سوما، عن ترشح المايسترو مصطفى حلمي، خلال لقائها مع القاهرة 24، قائلة: مصطفى حلمي، طبعًا هو غني عن التعريف ووالده كان نقيب الموسيقيين لمدة 3 دورات ورا بعض، وقدم حاجات كتير جدًا للنقابة، مصطفى حلمي شخص مجتهد ودارس ومتربي في البيت اللي فيه نقابة تقريبًا.
وأضافت: دعمي ليه لأني شايفة إن فيه فكر جديد عنده وفيه حاجات ممكن تطور كتير في النقابة، وفكرة دعم الشباب ووجودهم ممكن يضيف حاجة جديدة لنقابة الموسيقيين، وأنا بحترم كل الزملاء، وأنا على علاقة شخصية طيبة جدًا بيهم، وبتمنى الخير قبل كل شيء.
