رفضت أدوار الإغراء وبعاني بسبب رقتي.. أبرز تصريحات نورهان التليفزيونية
حلت الفنانة نورهان ضيفا على أحد البرامج التليفزيونية، وكشفت خلال حوارها سبب ابتعادها عن الوسط الفني بعد مسلسل عائلة الحاج متولي، بجانب الحديث عن تفاصيل حياتها الشخصية.
ويرصد لكم القاهرة 24 أبرز تصريحات نورهان التليفزيونية:
- مكنتش متعمدة أبعد عن الفن بعد مسلسل الحاج متولي، وسبب ابتعادي إني اتجوزت وأنجبت ابني معاذ، كنت مهتمة إني أربيه لأني معنديش إخوات ومكنتش عايزة أسيبه للدادة.
- اشتغلت معلمة عشان أكون جنب ابني في المدرسة، وتدرجت في التدريس وبقالي 10 سنين، كنت بدرس إنجليزي في الأول بالمدارس الدولية، وبعدين اتجهت إلى تدريس المسرح بالإنجليزي.
- حصلت على شهادة دولية في التدريس المسرحي باللغة الإنجيلزية.
- أنا بحب الشغل ومبعرفش أعيش من غير شغل، أنا بكون قلقة من الأخطاء، بس بقنع نفسي إن الفن والجمال وكل الحاجات المتعلقة بالآراء نسبية.
- ياسمين صبري ممثلة جميلة بتمثل حلو وشكلها حلو وكل حاجة فيها حلو، ومش عارفة الهجوم عليها ليه.
- المخرج يقدر يوجه الممثل كويس، ولو ياسمين صبري اتحطت مع مخرج من اللي بيعرفوا يوجهوا الممثل هتكون في حتة كويسة.
- اتعرض عليا أدوار إغراء ورفضت.
- بعاني من رقتي، ممكن يكون عيب في درجة استجابة المجتمع.
- الحمد لله مظهرتش مع رامز جلال، وبغض النظر هو لا يتحمل الذنب، وأنا ضد اللعب بالمشاعر والخداع حتى لو بهزار، لأن الهزار يعني إننا إحنا الاثنين مبسوطين.
- حتى لو الفنان عارف إنه في برنامج مقالب بيعيش الحالة من الصراخ والتوتر.
- نور الشريف، أعظم شخصية قابلتها في حياتي، وكنت محظوظة إني اشتغلت معاه، واتعلمت منه كتير في مسلسل عائلة الحاج متولي، وهو اللي اختارني.
- محمود ياسين كان حنون وعنده حكمة، وشُفت دا في تعامله مع أبنائه رانيا وعمرو، وهو من ألطف وأجمل البشر.
- أحمد عبد العزيز، صديق غالي، ولما كان في سوق العصر كان فتى أحلام البنات، وكنت محظوظة إن اسمي ارتبط بيه، هو قيمة وقامة كبيرة.
