محمد صبحي: والدي ضربني بالقلم عشان محترمتش المسرح.. وأرفض العمل تحت مسمى المرفهاتي
كشف الفنان محمد صبحي موقف تعرض له في المسرح مع والده عندما كان صغيرًا، كما أعرب عن رفضه لـ العمل تحت اسم المرفهاتي.
موقف لمحمد صبحي مع والده في المسرح
وتحدث الفنان محمد صبحي عن موقف جمعه مع والده خلال وجودهما في المسرح، وذلك من خلال لقائه في برنامج بروين شو، حيث قال: والدي كان رحمه الله إداري في فرقة رمسيس يوسف وهبي، وكنت بستغل الفرصة ديه، وأنا عندي 6 أو 7 سنين، وأروح وأتفرج على المسرح كل يوم.
وأضاف صبحي: وفي ليلة أنا قعدت ويوسف وهبي كان بيتكلم، واتحركت وأنا قاعد على الكرسي وعمل صوت، لقيت الـ 700 نفر اللي قدامي بصوا ورا عليا، أنا خوفت ويوسف وهبي سكت، وكملوا عادي، ومش عارف إني عملت جريمة.
واستكمل: بعدين خرجت بره في الاستراحة، لقيت والدي جايلي وقالي أما تقعد في المسرح متتحركش علشان تعمل صوت وتوقف المسرحية، وضربني بالقلم، وأنا اعتبرت ده ظلم، أنا معملتش جريمة قد القلم المهين ده، بس بعد شوية اكتشفت إن هو جريمة علشان محترمتش المكان اللي أنا فيه.
محمد صبحي: الفنون فيها جزء أساسي من الترفيه.. ولكن ميبقاش الأساس في اختياري
وأردف محمد صبحي تصريحاته بالحديث عن غضبه من إطلاق اسم المرفهاتي على الفنان، فقال: مسألة الترفيه هي جزء أصيل من الفن وكل الفنون، حتى الفن التشكيلي اللوحة فيها ترفيه للنفس، الفنون فيها جزء أساسي من الترفيه، ولكن ميبقاش الأساس في اختياري، أما تختاريني علشان أعمل تحت عنوان الترفيه، يبقى اختصرت حاجات كتير أوي في هذا الفن، واعتراضي إني أعمل تحت هذا العنوان.
