صاحبة تريند فين العريس: امبارح فاتحتي والنهاردة كسروا فرحتي.. والعريس: صحيت لقيت الدنيا مقلوبة على صورتنا
تصدر هاشتاج فين العريس موقع التواصل الاجتماعي فيسبوك خلال الساعات القليلة الماضية، وذلك بعد انتشار فيديو لفتاة تحتفل بحفل خطوبتها على حبيبها الذي انتظرها للارتباط الرسمي بها، ولكن بدون قصد تعرض العريس في الفيديو لفتلر وضع له مكياج، ليتعرضا العروسين للتنمر الشديد.
تفاصيل تريند فين العريس
تواصل القاهرة 24 مع العروس التي تدعى منة طه، حيث قالت: الفكرة كلها إن محمد زميلي في الجامعة وكنت أعرفه من سنة، وكنا بنحب بعض، كنت مستنين اللحظة ديه، وكانت فرحة كبيرة أوي.
العروس تكشف التفاصيل
وأضافت منة: لما جه يتقدم لي كانت فرحة كبيرة، فصورت اليوم بيومه ومستنية يوم الفاتحة، وكنت كل يوم بفتح الكاميرا وأصور لمدة 5 أيام، وفي اليوم الخامس، بجيب خطيبي في الكاميرا، وقلت أطلع معايا في الفيديو، فطلع والفلتر ظهر عليه من غير ما أخد بالي، لأني كل يوم بحط الفلتر لنفسي.
وتابعت: الدنيا كانت زحمة، وصورت الفيديو وكملت رقص ويومي، وبعد ما نزلت الفيديو لقيت كمية تنمر وتريقة، وكلام يجرح الواحد، وأنا امبارح قراية فاتحتي، ودلوقتي أنا مكسورة، ملحقتش أفرح أني اتخطبت لحد بحبه زي البنات، كل ده بسبب كلام سخيف، بسبب إن الفلتر جه عليه بس.
وأكملت منة خلال حديثها مع القاهرة 24: كل شخص تنمر علينا، وإحنا معملناش حاجة، حسبي الله ونعم الوكيل وجع قلبنا بيها، الكلام يجرحه ويجرحني، ونزلت الفيديو عشان أفرح أني اتخطبت له، والفرحة قلبت بكسرة ووجع قلبي.
العريس يرد على التريند
في حين قال العريس محمد دسوقي، إنه كان يخطط منذ فترة طويلة لخطبة منة، متابعا: كنت بشتغل وبتعب عشان أخطبها، وفي وسط الهزار كنا فرحانين جدا، ومنة شغلت الموبايل وصورتنا، والأغنية اللي شغالة مش حافظها فكنت مبتسم ومش واخد بالي من الفلتر، ومكنتش مركز، ومكنتش عارف إذا كان فيديو ولا صورة، واليوم خلص وروحت نمت، صحيت لقيت الفيسبوك كله مقلوب.
وأضاف في تصريحات خاصة لـ القاهرة 24: اللي اتنمروا علينا دول ناس مريضة، لما يكسروا بفرحة حد بحاجة ممكن تسبب له اكتئاب ومشاكل كتير، مختتما حديثه: حسبي الله ونعم الوكيل فيهم.
