واجعة قلوبنا وكفاياكم جلد.. نجوم الفن يدعمون شيرين عبد الوهاب بعد دخولها المستشفى
حرص العديد من نجوم الفن على دعم الفنانة شيرين عبد الوهاب في أزمتها الأخيرة، بعد حجزها في أحد مستشفيات الصحة النفسية بالقاهرة خلال الساعات الماضية، وتصريحات شقيقها التي كشفت مؤامرات كثيرة؛ تُقام من طليقها الفنان حسام حبيب ضدها.
نجوم الفن يدعمون شيرين عبد الوهاب في أزمتها
وجهت الفنانة راندا البحيري، رسالة دعم للفنانة شيرين عبد الوهاب، عبر حسابها الشخصي بموقع فيسبوك.
وشاركت راندا البحيري، مقطع فيديو، جاء فيه: أتمنى تكوني كويسة.. أنا متعلقة بشيرين، أول مرة زعلت من شيرين أوي لما قالت إنها هتعتزل اليوم ده، كنت مخنوقة فيه بشكل مش طبيعي، وبعدين سمعت قرار الاعتزال يومها حسيت أن القرار ده مش ملكها، ده مش حقها لأنها بتاعتنا بتاعة المصريين.
وتابعت راندا البحيري: ليه ده أنا هتمنى اسمع صوت شيرين تاني، قعدت أقول يارب يطلع الكلام ده مش صح، أنا دلوقتي بتمنى أن إنتي تكوني عارفة غلاوتك ومقدارك عند الناس، لأن من الواضح أنتي متعرفيش خالص أنتي لو عارفة المشكلة تخلص؛ الواحد محتاج دافع يعيش عشانه وتجدد شغفه علشان تعيش في الدنيا.
وأضافت راندا البحيري: حُب الناس حاجة كبيرة جدًا تخلي الواحد مبسوط، ويقدر يقف قدام مرض وأي حاجة وحشه وتزعل على زعلها.. أنا الكام مرة اللي تعبت فيهم بالفعل في ناس تعبت على تعبك وزعلت على زعلك أنا لما بتزعلي أنا بزعل.. هي صعبانة عليا جدًا مكنتش أحب توصل للمرحلة دي من الوجع وبدعيلك وبحبك.
إيناس عز الدين
وكتبت الفنانة إيناس عز الدين، منشورا عبر حسابها الشخصي بموقع الفيس بوك، جاء فيه: شيرين أنا بحبها لدرجة إني نفسي أمسكها وأفضل ألطش فيها بكل قوتي لحد ما تفوق وترجع لنفسها.
وتابعت إيناس عز الدين: واجعة قلبي باللي بتعمله في نفسها، وباللي بيعمله اللي حواليها فيها.. كانت محتاجة حاجة وناقصاها، وعايزة تعيشها، وحسام استغل ده فيها، وداس بكل ما فيه من قوة وهدمها فنيا ومعنويا ونفسيا، وكمان صحيًا.
واختتمت إيناس عز الدين، قائلة: الضعف والاحتياج المعنوي هما الوسيلة اللي شيرين اتأذت بسببهم، كفاياكم جلد وتقطيع فيها.. ربنا ما يكتب عليكم اللي هي فيه، وينتقم من اللي كان السبب.
نشوى مصطفى
كما أعربت الفنانة نشوى مصطفى، عن حُزنها واستيائها الشديد لما حدث لشيرين عبد الوهاب، مطالبة جُمهورها بالدعاء لها، بأن تخرج من هذه الأزمة بسلام.
وكتبت نشوى مصطفى، منشورا عبر حسابها الشخصي بموقع فيسبوك، قائلة: ياعيني عليكي ياشيرين.. ياعيني عليكي يابنتي.. إيه اللي بيحصل لك ده، ياوجع القلب.. ليه الفضايح.
نور محمود
كما حرص الفنان نور محمود على دعم الفنانة شيرين عبد الوهاب، عبر حسابه الشخصي بموقع فيسبوك، قائلا: هو مافيش حد في كل الدايرة المحيطة بشيرين بيحبها بجد.
وتابع نور محمود: يعني إيه واحدة تتعد من المواهب الأصيلة في البلد تتلطش يمين وشمال من كل اللي حواليها، وتضرب وتتبهدل وتتفضح علي كل القنوات والصفحات، بحجة أنهم عايزين مصلحتها، وفي الآخر تترمي في مستشفى.. زي ما يكونش ليها راجل واحد أو أي حد يقف يدافع عنها.
واختتم نور محمود حديثه، قائلا: غلطت ماشي.. بس مايكونش الثمن إنها تتمرمط كدة.. الست دي بتنتهي، وموهبتها هتتدفن.. يارب تلحقوها.
كريم سامي مغاوري
كتب كريم سامي مغاوري، منشورا، عبر حسابه الشخصي بموقع فيسبوك، جاء فيه: شيرين تستحق إننا نساندها.. موهبة كبيرة ياما أسعدتنا، وحقها على جمهورها أنهم يساعدوها ويساندوها حتى لو بكلمة حلوة عشان ترجعلهم بسرعة، وتملى الدنيا بفنها وطاقتها الجميلة.
هند رضا
شاركت الفنانة هند رضا، متابعيها عبر حسابها الشخصية بموقع انستجرام؛ صورة للفنانة شيرين عبد الوهاب، وعلقت عليها قائلة: إلى شيرين الابنة والأخت والأم والفنانة المشهورة.. محنة شديدة بتمر بيها مع نفسك وأسرتك وجمهورك، لكن تقدري تتغلبي عليها بقوتك وإيمانك، وحبك لكل النعم إلا ربنا أنعم عليكي بيها.
وتابعت هند رضا: وتقديري ياشيرين ترجعي أقوى من الأول، لأن في ناس كتير بتستمد القوة منك، ودي مسئولية كبيرة، وفرصة تأكدي فيها لنفسك ولكل حبايبك إنه بأصرارك تقدري تقفي على رجلك من تاني، وتحفظي شيرين الإنسانة والفنانة المحبوبة المحترمة.
