سارة الطباخ: شيرين حساسة وقلبها زي البفتة البيضا ومتسرعة.. وخيرها على الكل أولهم أخوها
علقت المنتجة سارة الطباخ على هجوم محمد عبد الوهاب شقيق الفنانة شيرين عبد الوهاب، بسبب دعمها لحسام حبيب، قائلة: تم الزج باسمي في أزمة الفنانة شيرين عبد الوهاب.
وقالت في مداخلة هاتفية مع الإعلامي عمرو أديب عبر برنامج الحكاية مساء اليوم الاثنين: أنا علاقتي بشيرين عبد الوهاب طيبة جدًا وآخر رسالة بعتها لها كان يوم عيد ميلادها في 8 أكتوبر الجاري.
واستنكرت سارة الطباخ: شقيق شيرين عبد الوهاب خلال مداخلته أمس أسند لي عبارات واتهامات ولم يقدم عليها أي دليل مش معقول إن أي حد عايز يقول عليا كلمتين ويسند ليا اتهامات الموضوع يعدي.
وأكدت المنتجة سارة الطباخ: ياسر قنطوش محامي شيرين عبد الوهاب حاول التواصل مع سائق أو مساعد الفنانة للاطمئنان على حالتها.. وحاولنا نوصل بكل الطرق لمكان وجود شيرين وعرفنا إنها في مستشفى بالنزهة.
واستطردت: مش طبيعي إنه حد يختفي ونكلمه تليفونه مغلق، وكلمت مساعدة شيرين في المنزل وقالت لنا إنها سافرت.. وده خلانا نشك ونتوتر في مدى أمان الفنانة شيرين عبد الوهاب.. وكنت عايزة أطمن عليها، ولما رحت المستشفى أنكروا وجودها.
وأوضحت: أنا كنت موجودة أمام المستشفى الساعة 3 الفجر بالبيجامة ومكنتش واخدة صحفيين معايا.. ورفضت الإدلاء بأي تصريحات صحفية عشان كنت قلقانة على شيرين.. وبكرة هقدم طلب رسمي بالاتهامات التي أسندت إليّ.. وأنا قاعدة في بيتي الساعة 3 الفجر جالي رسالة من حسام حبيب إن شيرين عندها مشكلة كبيرة، قالي إنه يستغيث بأن شيرين اتاخدت من بيت مقيمة فيه عنوة بعد الضرب والسحل، وأخدوها بملابس المنزل دون حذاء في رجلها، وأنها مختفية من يوم الخميس.
وأكملت حديثها: قولتله هدخّل معايا حالا ياسر قنطوش المحامي بتاع شيرين، هو المحامي بتاعها، وياسر قنطوش قرر فورًا يتواصل مع حد وحاول يتواصل مع سائق أو مساعد شيرين مردش عليه، وكلم نقيب الموسيقين ومصطفى كامل أكد له إن فيه مشكلة.
وقالت مستكملة حديثها: أخدنا بعض وروحنا النزهة معرفش رايحة المكان بالتحديد.. وشيرين أعرفها من 2007 وأكلنا عيش وملح في بيوت بعض، ولو حتى مش قريبة من شيرين حاليًا، بس لو حد كلمك وقالك صديق ليك أكلت عيش وملح ومضروب ومسحول مش هتنزل؟.
وأضافت: طلعنا النزهة عشان نشوف المستشفى فين سألنا عليها هناك وقالولنا مفيش حد بالاسم دا والمحامين المستشار ياسر موجود.. وحسام كان لسه موصلش المستشفى وحاولنا نتأكد هي موجودة ولا إيه عشان نطمن وليه بتقولوا مش موجوده ليه حاولنا نوصل بكل الطرق أن شيرين في المكان بسلام وأمان ودا هدفنا.
وأكدت: حسام جه وكان في صديقة موجودة كانت على علاقة عمل بشيرين قبل كده لأننا مكناش لاقينها وتليفونها كان مقفول.. كلمت طارق مدكور وصديقة لينا تليفونها مغلق وكانت موجودة مع شيرين في الحدث مردتش.. اتاكدنا من وجود شيرين في المستشفى.
وأوضحت: مش معايا رقم محمد أخو شيرين عشان أكلمه، وازاي أكلمه والقصة اللي كانت متداولة بتقول إنه هو اللي ضربها، ومحمد أخو شيرين لو شايف إنه بيعمل حاجة صح لشيرين كان كلمني..
أكملت: مش صحيح إننا وقفنا تحت المستشفى وفضلنا ننده عليها، دا خيال علمي، وتقريبًا كنت نازلة بالبيجامة أكيد مش هاخدهم معايا.. ولو حد كان موجود هناك رفضت الإدلاء بأي تصريحات صحفية عشان كنت قلقانة عليها.. الموضوع دلوقتي مع المستشار ياسر.. ومحمد أخوها دا أكتر واحد عارف إن شيرين عملت معاه إيه.. كان من الأفضل يتواصل معانا ووقتها كنا مشينا في أقل من ثانية.. ولو كانت نيته سليمة كان تواصل معانا دا كده بيساعد الناس تشوه صورتها أكتر.
وأردفت حديثها قائلة: كلنا عارفين إن نبيل عبد المقصود دكتور شيرين معلومة، وهو صرح تليفزيونيا انها بقت زي الفل ولما يبقى تصريح الطبيب المعالج للفنانة انها زي الفل، واتاخدت عنوة للمستشفى فكانت علامة استفهام كبيرة جدًا.
واختتمت حديثها: معنديش مشاكل مع شيرين عبدالوهاب ولو فيه أمور فاتت كان فيه مكالمة ثلاثية مع ياسر وشيرين وعلاقتي بيها طيبة، ولما روحت امبارح لشيرين روحت حبًا فيها وخوفًا عليها وعايزة أطمن عليها.. والتناول اللي تناولناه لهذا الموضوع لا يصح لفنانة كبيرة.. كلنا لينا في شيرين دي صوت مصر الأول وهي حبيبتنا وصاحبتنا.. شيرين حساسة جدًا وقلبها زي البفتة البيضة والناس عارفة إنها متسرعة وخيرها على الكل أولهم أخوها وهي شخصية حساسة جدًا.
