بعد جمع 40 مليون جنيه لشراء الحقنة الأغلى بالعالم.. والدة سيلين: بتجهز للحَقن وفي انتظار نتائج التحاليل
قالت رضوى حمدي، والدة الطفلة سيلين أيمن، المصابة بالضمور العضلي الشوكي، إن طفلتها في انتظار الحَقن، بعدما نجحت حملة التبرع في جمع 40 مليون جنيه، لشراء الحقنة الأغلى في العالم.
سيلين في انتظار الحقن
وأضافت والدة سيلين عبر صفحتها الخاصة على فيس بوك: اطمئنوا سيلين عملت التحليل الفيروسي، وفي انتظار نتيجته خلال أيام، وبتتجهز للحقن إن شاء الله في أقرب وقت دعواتكم معانا، نكمل المشوار وربنا ييسر لنا أمورنا .
وتابعت: وعد سيلين لما تكبر وأشوفها بتمشي إن شاء الله مع كل خطوة هخليها تدعيلكم كلكم، كأنها صدقة جارية وهحكيلها حكاية سيلين مع عائلتها الشعب المصري والوطن العربي، وحبهم ليها واللي عملوه معاها، وتأكدوا إن ده هيأثر في بناء شخصيتها وتربيتها، شكرا إنكم علمتوني حاجات كتير أوي.
سيلين تنجح في جمع 40 مليون جنيه
ويوم الأحد الماضي، نجحت حملة التبرع للطفلة سيلين أيمن، المصابة بالضمور العضلي الشوكي، في جمع مبلغ 40 مليون جنيه لشراء الحقنة الأغلى في العالم.
وقالت الصفحة الرسمية لحملة التبرع: الحمد لله يا رب على كرمك الواسع، تمت المهمة بنجاح بفضل ربنا ثم بتبرعاتكم ووصلنا لــ 40 مليون جنيه، تمن الحقنة الأغلى بالعالم يا سيلين.
وأضافت: شكرا للشعب المصري اللي فعلا وقت الأزمات بيبان، شكرا للجاليات العربية اللي شاركوا من دول كتير مختلفة ولكل حد كان بيعمل لنا شير.
وتابعت: الشكر الأخير بقي لكل متطوع إدى وقت ومجهود، وأولهم فريق عظيم اسمه خلية نحل إنقاذ سيلين، وشكر كبير للفريق اللي دخلنا تويتر أكتر من مره بدون ما حتي نطلب.
