والد عروس الإسماعيلية: روحت أزورها لقيتها بتصرخ من الشباك وبتقول عبد الله حابسني | خاص
ينشر القاهرة 24 نص التحقيقات في قضية عروسة الإسماعيلية، التي أشعلت مواقع التواصل الاجتماعي خلال الفترة الماضية، عقب اتهام زوجها بالتعدي عليها بالضرب، واحتجازها داخل شقة شقيقه لمدة 15 يومًا، ومنع والدها من زيارتها.
نص تحقيقات عروسة الإسماعيلية
وفي هذا الصدد ننشر أقوال والد عروسة الإسماعيلية أمام جهات التحقيق والتي جاءت كالآتي:
اسمي محمد عمران، وأبلغ من العمر 65 سنة على المعاش، واللي حصل إن أنا روحت على بيت بنتي مها عشان أوديلها الموسم بتاع مولد النبي، ولما روحت وأنا تحت العمارة وندهت على عبدالله عشان يفتح الباب عشان اطلع، لقيت بنتی مها طلعت من الشباك ولقيتها بتصوّت وتقولي إن عبد الله ضاربها وحابسها في البيت ومنعها من النزول، وبتصرخ الحقني يا بابا، وساعتها انا لقيتها مضروبة في وشها وعينيها الشمال فأخدت بعض وروحت على القسم عشان أعمل محضر بالواقعة.
أضاف والد عروس الإسماعيلية في التحقيقات: رجعت أخدت بنتي بعد ما دخلت ناس تتوسط بينا، وروحت بيها على القسم وعملنا محضر هناك، بأن جوزها ضربها وحبسها وعورها، ولقيناه هناك عامل محضر لبنتي بيقول إنها هربت من بيته بعد ما سرقت منه الدهب ومشيت على بيتي.
وكانت محكمة جنايات الإسماعيلية، قد أصدرت الأحد الماضي، قرارًا بتأجيل جلسة الحكم على المتهم عبدالله أحمد المعروف إعلاميًا بـ عريس الإسماعيلية، والمتهم بالاعتداء على زوجته مها محمد، والمعروفة إعلاميًا بـ عروس الإسماعيلية، وإحداث إصابات بها، واحتجازها دون حق ليوم 23 أكتوبر الجاري.
