المخرج عصام نصار عن مشاركة المدفعجية في فيلم هاشتاج جوزني: متقدمين في صناعة موسيقية سليمة
تحدث عصام نصار، مخرج فيلم هاشتاج جوزني، عن مشاركة كل من الفنان أحمد سعد، وأبو، والمدفعجية، في العمل، مؤكدًا إنه تم تقديمهم في صناعة موسيقية سليمة.
وقال عصام نصار، في حوراه مع القاهرة 24: الناس لما تدخل الفيلم هتسمع لون الأغاني اللي بتحبها واللي بيحب يسمع لون معين هيلاقيه ولكن كله متقدم في صناعة موسيقية سليمة ودي نقطة مهمة.
وتابع: أبو ليه جمهور عظيم وهو ممتع وإضافة للفيلم كبيرة، وأستاذ أحمد سعد حدث ولا حرج، أكيد مش محتاجين نسمع رأيي أنا في أدائه ولا حضوره ولا صوته، والمدفعجية شباب متحمس وعندهم لغتهم الخاصة في الموسيقى وكلنا بنسمعها ومبسوطين بيها ومتقدمة بشكل قوي كـ صناعة.
كما تحدث عصام نصار، عن فكرة فيلم هاشتاج جوزني، موضحًا إنه كان مهتمًا بتفاصيل العمل حتى يخرج بالشكل الذي يليق بالجمهور قائلًا: فكرة الفيلم رومانسية كوميدية، وتفاصيل الفيلم في منتهى القوة وأنا كنت مهتم إنها تطلع زي ما الناس متوقعاها وأتمنى إنها تنجح، لأن الرومانسي كوميدي ده الناس محتاجينه، الناس عايزة تدخل فيلم وتتبسط فيه وتسمع أغاني وتضحك وتشوف قصة حب.
وأضاف: اسم الفيلم جديد ومربوط بحدث أساسي في الفيلم ودي نقطة مهمة، إحنا بنعمل صناعة وبنعمل فن ومهم نستفيد بكل عناصر الصناعة ومن ضمنها السوشيال ميديا ودي حاجة بتحصل في الفيلم.
أبطال فيلم هاشتاج جوزني
يشارك في فيلم هاشتاج جوزني العديد من الفنانين بجانب مايان السيد، منهم: الفنان أمير المصري والفنانة صابرين وبيومي فؤاد ودينا وإسلام إبراهيم وريهام الشنواني.
