ارجعي لبناتك وماتسبيش نعمة ربنا.. نجوم الفن يدعمون شيرين عبد الوهاب بعد أزمتها الأخيرة │ خاص
أثارت الفنانة شيرين عبد الوهاب، جدلًا واسعًا خلال الفترة الماضية، عبر مواقع التواصل الاجتماعي، بعد أزمتها الأخيرة وحجزها في أحد مستشفيات الصحة النفسية بالقاهرة خلال الساعات الماضية، بجانب تصريحات شقيقها، الذي كشفت مؤامرات كثيرة؛ تُقام من طليقها الفنان حسام حبيب ضدها.
وحرص العديد من نجوم الفن على تقديم دعم لشيرين عبد الوهاب، عبر موقع القاهرة 24، متمنين أن تمر من هذه الأزمة بسلام، وأبرزهم نداء شرارة، إلهام شاهين، ورزان مغربي، وغيرهم.
إلهام شاهين
وجّهت الفنانة إلهام شاهين، رسالة دعم لشيرين عبد الوهاب، وقالت في تصريحات خاصة لـ القاهرة 24: ربنا معاها، وبطلب منها أن تهتم فقط بصحتها أولًا ثم شغلها فقط.
ميار الببلاوي
كما حرصت الفنانة ميار الببلاوي، على دعم شيرين عبد الوهاب، بعد أزمتها الأخيرة مع شقيقها، حيث قالت في تصريح لـ القاهرة 24: كنت متوقعة النهاية دي، وأكثر حاجة كنت خايفة عليكي منها هي الانتكاسة دي، وأن الطرف الآخر ميسمحش أنك تتعافي وترجعي تقفي على رجليكي مرة تانية.. في رجالة بتعيش عشان تدمر الست وتدمر نجاحها، وتطفي بريقها وهو ده اللي حصل.. أنا شفت لقاء أستاذ عمرو اديب، وأكثر كلمة عجبتني لما قال: إيه الجواز دي.. هي الجوازة اللي تجيب ليا الفضائح.. الجوازة اللي تخسرني أهلي وأعصابي وصحتي وضنايا دي جوازة.
واستكملت ميار الببلاوي: أنا مش فارق معايا غير بناتها اللي ما لهمش غيرها، البنات اللي شافوا أمهم في وضع أنا مش حباه، هي دلوقتي بقت شكلها قدامهم إيه.. احمدي ربنا أن ليكي أخ عايز ينقذك ويفديكي برقبته.. عايز ينقذك عشان خاطر عيالك.. احمدي ربنا أن أختك اللي أنتي طردتيها هي اللي قاعدة بأولادك.. احمدي ربنا أن أمك اللي عندها 80 سنة لسة بتحاول باللي باقي فيها من قُوة وبتدافع عنك، ما تسيبيش النعم دي كلها يا شيرين.. ما تسبيش نعمة ربنا في بناتك، وفي اخواتك وفي أمك وفي جمهورك، عشان تروحي للي بيدمرك ويخليك تقعي في فضائح وفي بهدلة وفي قضايا.
نداء شرارة
ووجهت نداء شرارة؛ رسالة دعم شيرين عبد الوهاب، عبر القاهرة 24، قائلة: ربنا معاها وترجع لجمهورها بالسلامة.. ربنا ينور بصيرتها ويحفظها ويرجعها لبناتها سالمة على خير، وربنا يبعد عنها الناس اللي عايزين لها الشر علشان هي كويسة وطيبة وتستاهل كل خير.
إيمى طلعت زكريا
قالت الفنانة إيمي طلعت زكريا في تصريحات خاصة لـ القاهرة 24: ارجعي لبناتك قبل ما ترجعي لجمهورك، وكل اللي فات ده ارميه ورا ظهرك.. إن شاء الله بعد الشدة دي بيجي الفرج، وهترجعي وهتبقى أحسن وكلنا بندعيلك وبنحبك وربنا معاكي يارب.
رزان مغربي
وأكدت الفنانة رزان مغربي، دعم شيرين عبد الوهاب، موضحةً أنها من أجمل الأصوات في الوطن العربي، متمنية لها أن تمر من هذه الأزمة قريبا، وتعود مرة أخرى لجمهورها.
وذكرت رزان مغربي، في تصريحات خاصة لـ القاهرة 24: متضامنة مع شيرين كزوجة وكأم وكفنانة، وبتمنى لها كل الخير لأنها تستاهل الخير.. شيرين عبد الوهاب، من أجمل الأصوات، وعلى الصعيد الشخصي فنانة وجميلة، كل إنسان عنده تحديات، ويتمنى أنها هتطلع من المرحله دي على خير.. وبتمنى تهتم ببناتها وأمها وأخوها، لأن الدم عمره ما هيبقى ميه، وأتمنى لها كل الحب والتوفيق وتلاقي في حياتها الحب سواء أكان في شغلها أو في صديق أو أهلها، لأن الإنسان والفنان بيدورعلى الحب علشان يقدر يكمله.
