20 نوفمبر.. أولى جلسات محاكمة بلطجي دمياط
حددت المحكمة المختصة، جلسة 20 نوفمبر المقبل كأولى جلسات محاكمة المتهم إبراهيم الخياط، والمعروفة إعلاميا بـ بلطجي دمياط، بتهمة قطع يد سيدة وإصابة نجلها، والشروع في قتلها بمنطقة كفر البطيخ بمحافظة دمياط.
محاكمة بلطجي كفر البطيخ
وكان قد أمر المستشار حمادة الصاوي، النائب العام، بإحالة المتهم إبراهيم الخياط الشهير بـ بلطجي دمياط، إلى محكمة الجنايات المختصة؛ لمعاقبته فيما اتهم به من استعراض القوة، والتلويح بالعنف والتهديد، واستخدامها ضدَّ سيدة وابنِها بكفر البطيخ.
وقال المتهم إبراهيم الخياط والمعروف بـ بلطجي دمياط في التحقيقات: اللي حصل إن أنا كنت قاعد في الورشة بتاعتي اللي في بيتي وبعدين ببص لقيت محمد.م شبانة دخل عليا وبيتهجم عليا في الورشة بتاعتي وكان معاه سكينة حاططها في الجاكت وكانت أمي قاعدة علي باسطة البيت وقومت جايب خشبة وخرجت ليه من الورشة بتاعتي وبعدين مسكت فيه وقعدنا نضرب في بعض وأنا ضربته بالخشبة في كل حته أطولها منه وبعدين الناس اتلمت وحاشونا، وببص لقيت والدته دخلت عليا وكانت معاها سكينة وكانت عاوزه تعورني بيها، وأنا خبطتها بالخشبة على إيديها والناس حاشونا وكانت مشكلة كبيرة والدنيا اتقلبت والمركز لقيتهم جايين وأخدوني على مركز كفر البطيخ وهو ده كل اللي حصل.
وفي سياق متصل، كانت قد نشرت القاهرة 24 التحقيقات في القضية، حيث ألقت الأجهزة الأمنية القبض على إبراهيم الخياط، والمعروف إعلاميا بـ بلطجي دمياط، وتمت إحالته إلى جهات التحقيق وانتقل رجال التحقيق للمستشفى للاستماع إلى شهادة المجني عليه، ويدعى محمد وجاءت أقواله كالآتي:
س: هل كان المتهم على علم بتوقيت دلوفك إلى خارج منزلك آنذاك؟
ج: أيوه.
س: كيف وقفت على ذلك؟
ج: لأن أنا لما طلعت من البيت بتاعنا لقيته واقف قدام البيت وقالع هدومه وماسك سكينة طويلة وحامية جدا لدرجة إن هو لما ضربني بيها قطعت ودني.
س: هل من ثمة حوار دار بينك وبين المتهم إبراهيم الخياط؟
ج: لا.
س: ما المسافة التي كانت تفصل بينك وبين المتهم إبراهيم الخياط؟
ج: حوالي أقل من متر ونص تقريبا.
س: ما هي واجهتك بالنسبة للمتهم إبراهيم الخياط تحديدا؟
ج: هو كان جاي من ورايا من ناحية جانبي الشمال.
س: ما هي واجهة المتهم إبراهيم الخياط بالنسبة إليك تحديدا؟
ج: هو كان ماسك السكينة وواقف من ورايا من على الشمال وبيضربني بالسكينة وقطع ليا جزء من ودني الشمال.
س: هل من ثمة أسلحة أو أدوات كانت بحوزة المتهم إبراهيم الخياط؟
ج: أيوه.
س: ما طبيعة تلك الأسلحة والأدوات؟
ج: هو كان معاه سكينة كبيرة.
س: من أین استحصل المتهم على ذلك السلاح؟
ج: معرفش هي كانت معاه في ايديه وقتها.
س: وبأي يد كان ممسكا المتهم إبراهيم الخياط لذلك السلاح تحديدا؟
ج: هي السكينة كانت في إيده اليمين.
س: هل استخدم المتهم إبراهيم الخياط ذلك السلاح سالف الذكر في التعدي عليك؟
ج: أيوه.
س: هل لحق بك ثمة إصابات جراء ذلك التعدي؟
ج: أيوه.
س: صف لنا طبيعة تلك الإصابات ومن محدثها؟
ج: أنا حصلي قطع في كف إيدي اليمين والشمال وقطع في جزء من ودني الشمال واتعورت في ضهري وصدري بضربات من السكينة اللي كانت معاه واللى عورني هو إبراهيم الخياط.
س: كم عدد الضربات التي كالها لك المتهم آنذاك؟
ج: هو ضربني ضربات كتيرة مش فاكر عددها بالضبط واتسبب ليا في اللي أنا فيه دلوقتي.
س: أین استقرت تلك الضربات؟
ج: في ودني الشمال اتقطع جزء منها وكف إيدي اليمين والشمال اتقطع جزء منهم واتعورت في صدري وضهري.
س: هل كان بإمكان المتهم موالاة التعدي عليك؟
ج: أيوه لولا تدخل أمي والناس اللي اتلمت، كنت اتقتلت.
