مصطفى كامل لـ مطربي المهرجانات: اللي مش هيلتزم هيتحبس
أكد الفنان مصطفى كامل، نقيب الموسيقيين، إنه سيتخذ إجراءات قانونية ضد مطربي المهرجانات الشعبية في حال عدم التزامهم بقرارات نقابة المهن الموسيقية.
وقال مصطفى كامل، خلال مؤتمر نقابة المهن الموسيقية، المنعقد لوضع ضوابط عمل مطربي المهرجانات: إحنا لو خدنا قرار اتجاه أغاني المهرجانات هيتنفذ هنا وبرا، وبعمل بروتوكول مع وزارة الداخلية وإدارة المصنفات والأدب واللي مش هيلتزم هيتحبس مش هيتمنع.
وأضاف نقيب الموسيقيين: إحنا لازم نحافظ على أخلاقيات واللي هيتمنع هنا هيتمنع في أي مكان، واللي هيخالف هيتعاقب وهيترفع عليه قضايا هنا وأنا أعلم كيف أنفذ ذلك، وإن احتاج الأمر في ناس كتير من المحامين هيكونوا واقفين في ضهرنا هنا وبرا وهنرفع قضايا على كل اللي هيخالف، ولازم نصنع مستقبلا جيدا للأغنية وعلى الأقل ما تكونش رديئة والموضوع أخترق بيتي وبيؤذيني جدًا.
وأوضح مصطفى كامل، إنه سيعمل على تغيير مصطلح مهرجانات، قائلًا: أنا ضد كلمة مهرجان لأنها كلمة خاطئة، ما ينفعش تتقال على أغنية والمصطلح ده هنشيله إن شاء الله الفترة اللي جايه، وأنا مش عايز أقطع رزق حد بس مش عايز حد برضو يأذي ولادنا.
مصطفى كامل
وسبق وقرر الفنان مصطفى كامل، نقيب الموسيقيين، إيقاف تصاريح مطربي المهرجانات، وقال خلال مؤتمر للنقابة: إيقاف كافة التصاريح الصادرة لجميع مؤدي المهرجانات مؤقتًا لحين توجيه الدعوة إلى رموز الفن والثقافة بمصر، للاجتماع من أجل بحث هذه الظاهرة، وعلى رأس أولويات القرارات المتخذة هو الحفاظ على ريادة مصر الفنية والارتقاء بذوق مصر العام ووضعها حيز التنفيذ.
