إنتي مش أول ولا آخر واحدة تنفصل.. هالة صدقي توجه رسالة لـ شيرين عبد الوهاب في أزمتها
حرصت الفنانة هالة صدقي على دعم الفنانة شيرين عبد الوهاب، بعد أزمتها الأخيرة، واحتجازها داخل أحد المستشفيات، ليتم علاجها، إذ أعربت عن حُبها الكبير لها، متمنية لها الشفاء العاجل والعودة لجمهورها مرة أخرى.
وتابعت هالة صدقي، في تصريحات تلفزيونية: البنت الصغيرة اللي بدأت بمجهودها وموهبتها ووصلت من أبسط مكان إلى مكان تقدر تعرض فيه صوتها وأكبر المسارح، دي أكيد إنسانة قوية وذكية وعندها موهبة قوية جدا.
وواصلت هالة صدقي حديثها قائلة: شيرين عفوية وجميلة ومهتمة ببناتها وبتعلمهم أفضل تعليم، ومربية بناتها أفضل تربية، وهي مغلطتش، هي حبت واتجوزت.
وأردفت هالة صدقي: شيرين عبد الوهاب ست عاطفية جدا، وهي ما راحتش اتجوزت أي حد، هي اختارت حد بتحبه فأكيد هي لما تحس إنها اتهزمت وفشلت ده دمرها نفسيا، شيرين صدرت لنا الضحكة والابتسامة، ولما حلقت شعرها طلعت وغنت ومطلبتش دعم من حد ولا حد يقف جنبها، ولا طلبت من الإعلام ينزل أخبارها، سيبوها في حالها هي هتقوم بالسلامة.
هالة صدقي: إنتي مش أول واحدة ولا آخر واحدة تنفصل
وعن زيارتها لـ شيرين عبد الوهاب، خلال الفترة المقبلة من أجل الاطمئنان على حالتها الصحية، قالت هالة صدقي: أنا متأكدة إن طلب الزيارة هيترفض، لأن أي شخص عنده انهيار عصبي، بيمنعوا عنه الزيارات والتليفونات، علشان متشوفش أي أخبار سيئة تؤثر على حالتها النفسية، وعلى الرغم من ذلك هحاول أوصل لها علشان أطمن عليها.
ووجهت هالة صدقي رسالة لشيرين عبد الوهاب خلال لقائها قائلة: أنتي مش أول واحدة ولا آخر واحدة، إنتي معملتيش حاجه غلط ولا وحشة ولا آذيتي حد، الشخص الوحيد اللي أذيته هو نفسك، عايزاكي تستعجلي بالشفاء لإن ده في إيدك، وتقومي علشان بناتك لأنهم أهم حاجة ملهمش حد غيرك، وعلشان جمهورك والناس اللي بتحبك، عايزة أقولك حب الدنيا كله لكي بيكفيكي العمر والزيادة.
