القصة الكاملة..لمداخلة حسام حبيب عن أزمة شيرين عبد الوهاب
كشف الفنان حسام حبيب تفاصيل أزمة الفنانة شيرين عبد الوهاب الأخيرة بعد احتجازها في المستشفى وتفاصيل علاقته به والخلافات التي كانت بينهما وسبب الانفصال والكثير من التفاصيل المهمة في حياة الفنانة شيرين عبد الوهاب منذ زواجها من الفنان حسام حبيب.
ويسرد القاهرة 24 القصة الكاملة لأزمات الفنانة شيرين عبد الوهاب منذ زواجها من الفنان حسام حبيب وحتى احتجازها في المستشفى حسبما روى طليقها الفنان حسام حبيب في تصريحات تلفزيونية له مع الإعلامي عمرو أديب.
زواج شيرين وحسام حبيب
وقال الفنان حسام حبيب في تصريحاته التلفزيونية: العلاقة اللي كانت بني وبين شيرين أنها كانت بتستنجد بيا عشان كانت عايزة تخرج من المحيط اللي هي فيه وعشان هي كانت صديقة مقربة جدا وغالية جدا على قلبي فأنا كرست حياتي كلها ليها عشان كده اتجوزنا ولما ده حصل كان وجودي غير مستحب لكل اللي حواليها علشان الحنفية اتقفلت مابقاش حد يعرف ياخد منها حاجة.
وأضاف حسام حبيب: لما اتجوزت شيرين كان عندي فلوس أكتر منها وعمري ما خدت جنيه وكنت بحاول أكبر لها فلوسها، ولكن فيه ناس بيشتغلوا معاها وعايشين من خيرها هما اللي بيحاولوا يفرقونا وهي بتكافح وتروح وتتمرمط عشان يعيشوا هما وعاوزين يمتلكوها وأنا كنت هدفهم ومش هنكر أنهم نجحوا يفرقوا ما بينا.
حسام حبيب ومشواره الفني أثناء علاقته بشيرين
وقال الفنان حسام حبيب عن مشواره الفني أثناء زواجه بالفنانة شيرين: أنا منزلتش ولا أغنية من ساعة ما اتجوزت شيرين أنا راجل عندي كارير وبشتغل مغني مش مدير أعمال ولما اتجوزت شرين اتشهرت أكتر كان ممكن استغل ده وأعمل أغاني هبقى أشهر منها، لكني ماعملتش كده وما نزلتش أغنية واحدة من ساعة ما اتجوزنا.
تنازل حسام حبيب عن سيارته
وقال الفنان حسام حبيب عن تنازله عن سيارته وما أشيع عنه: أنا تنازلت عن عربيتي لأنها مش بتاعت شيرين أصلا وهي جت قالتلي أنت من حقك تاخد نسبة من الأغاني، ورفضت ولقيتها فجأة جيبالي عربية وقالتلي دي أقل من حقك واتخانقنا بسببها ووافقت أخدها في الآخر وهي باسمي والعربية هدية.
حسام حبيب وطريقة تعامله مع شيرين
وقال الفنان حسام حبيب عن طريقة تعامله مع الفنانة شيرين عبد الوهاب أثناء فترة زواجهما: عمري ما كنت عنيف مع ست ومتكلمتش لأني خوفت عليها ومدافعتش عن نفسي لأني متربي وخوفت لما اتكلم شيرين تتعرض لهجوم، وعمري ما كنت توكسيك أو عنيف مع ست دي كانت علاقة نقية والحب بيننا فضل موجود وقالت لي إنها هتعوضني وإني تعبت معاها.
حسام حبيب وموقفه من حلاقة شيرين عبد الوهاب لشعرها
وقال الفنان حسام حبيب عن موقف حلاقة الفنانة شيرين عبد الوهاب لشعر رأسها:كنا بنتخانق أنا وشيرين ودخلت حلقت شعرها وطلعتلي وأول ما شُفتها أغمى عليا، ووقعت في الأرض وانهارت من العياط، وطلبت الطلاق يومها وأنا قُلت لها أنا هطلقك واتطلقنا.
حسام حبيب عن إدمان شيرين عبد الوهاب
وقال الفنان حسام حبيب عن إدمان الفنانة شيرين عبد الوهاب: لا يمكن يكون ليا دعوة بـ إدمان شيرين ودا كان سبب خلافنا وكنت بنصحها تشتغل أكتر لكن أنا بدمر شيرين عشان متعملش فلوس! اللي بيدمروها هما اللي عايزين يحجروا عليها ودا اتقالي بالحرف من شخص ما وقال لي إنه معاه توكيل رسمي وهيسحب فلوسها.
حسام حبيب يأمن مستقبل بنات شيرين
وأوضح الفنان حسام حبيب: نصحت شيرين تأمن بناتها وهي عندها فلوس برة وأنا فتحت ليها حسابات بره مصر وحطيت فيها فلوسها وكل حاجة لبناتها وكل اللي بيخطط لأخذ أملاكها ده مش هيحصل علشان كل حاجة متئمنة لصالح بناتها.
حسام حبيب يروي تفاصيل الاعتداء على شيرين
وقال الفنان حسام حبيب بشأن الاعتداء على الفنانة شيرين عبد الوهاب ليلة ذهابها للمستشفى: اللي أخدوا شيرين للمستشفى خدوها وهما فاتحين عليها مطوة! هل دول جايين يعالجوها؟ هل ينفع شيرين عبد الوهاب تترمي وتتسحل بالمنظر دا؟ وهي كدا حصلها عقدة هتتعالج منها سنين بسبب اللي حصلها وقعدت تصرح وتعيط وتقول ألحقني يا حسام.
حسام حبيب يروي تفاصيل التعدي عليه
وأوضح الفنان حسام حبيب تفاصيل التعدي عليه ليلة أخذ شيرين للمستشفى: شيرين لما كانت بتتاخد للمستشفى قالت لأخوها أنا شيرين اللي عالجتك ووقفت جنبك تعمل فيا كدا، وياريت تسألوه هو اتعالج من إيه لسنين طويلة وأنا حاولت أنقذ شيرين بس ضربوني على دماغي وكتفوني وأخوها كان معاه صحابه مش دكاترة.
وتابع حسام حبيب: أنا شوفت منظر مش هعرف أنساه طول حياتي وبقى عندي عقدة وشقة التجمع كنت أول مرة أروح لها وأخدت الشقة عشان تبقى مقربة من الناس اللي كانت معاهم الفترة اللي فاتت وقالت لي أنا هرد لك حقك وهقف في ضهرك.
حسام حبيب يروي معاناته هو وشيرين بعد الانفصال
وكشف الفنان حسام حبيب تفاصيل معناته هو والفنانة شيرين بعدما انفصلا قائلا: علاقتي بـ شيرين عمرها ما كانت علاقة سامة، وقمة العذاب اللي إحنا فيه إننا بنحب بعض وعارفين إن العلاقة دي مش هينفع تستمر بسبب ضغط اللي حوالينا وتدخل الناس، وده أقذر أنواع العذاب اللي بنمر بيه دلوقتي.
حسام حبيب يكشف محاولة انتحار شيرين عبد الوهاب
وقال الفنان حسام حبيب: شيرين حاولت الانتحار بعدما دخلت المستشفى وكانت بتعاني لمدة 4 أيام وكان موجود في جسمها علامات ضرب كتير من الليلة اللي سحلوها فيها وكان شعرها مقطع.
حسام حبيب يوجه رسالة لشقيق شيرين عبد الوهاب
ووجه الفنان حسام حبيب رسالة لشقيق الفنانة شيرين عبد الوهاب قائلا:اتقي ربنا في أختك واتقي ربنا فيا واتقي العيش والملح وهاخد ضدك إجراء قانوني لأن اللي امنت عملته ده سب وقذف وتشهير وعمري ما هتنازل لو اطبقت السما على الأرض وأنت اتكلمت في عرضي وطلعت أنت البطل وحسبي الله ونعم الوكيل فيك وأنا أعمل تحليل المخدرات بمزاجي وأطلب أنت براحتك.
