ميدو ينتقد طريقة توزيع عوائد البث في الدوري: الزمالك أقل من الأهلي 40%
انتقد أحمد حسام ميدو، نجم الكرة المصرية السابق، فكرة توزيع عوائد بث المباريات على أندية الدوري المصري الممتاز بشكل منفرد.
تصريحات أحمد حسام ميدو
وقال ميدو في تصريحات تليفزيونية: ليس من حق الراعي الإعلان عن قيمة عقود الرعاية، والأهلي بيعرف يسوق لنفسه بشكل كويس، الزمالك بيشتغل كويس برضو من ناحية شكل النادي ولكن فكرة التسويق لبراند نادي الزمالك لسة الزمالك محتاج يشتغل عليها.
وأضاف أحمد حسام ميدو: فيما يخص نسب توزيع البث التليفزيوني هنا لازم نقف، براند الدوري المصري بيتباع، ورابطة الأندية بتوزع عوائد البث، ومفيش بلد في العالم بتبيع دوري منفرد وكل واحد لوحده، نفسي أفهم احنا ليه بنعمل كدة؟.
وواصل ميدو: لازم يبقى فيه اتفاق خاص بشأن توزيع عوائد البث لكل الأندية بنسب مُعينة مش كل واحد لوحده.
وأكمل لاعب الزمالك السابق: هل يعقل إن في 4 سنين يتعرض على النادي الأهلي فلوس البث التليفزيوني 660 مليون جنيه كعوائد بث ويتعرض على نادي الزمالك 280 مليون جنيه يعني تقريبا أقل 40% من اللي معروض على النادي الأهلي، هل ده عدل ربنا؟ أنا مش بتكلم على عقود الرعاية دي شطارة من النادي اللي بيسوق للبراند لكن أنا بتكلم على عوائد البث.
وأعلن أحمد حسام ميدو دعمه لمرتضى منصور رئيس نادي الزمالك في أزمة توزيع عوائد البث التليفزيوني في الدوري المصري.
وقال ميدو: الزمالك عنده جمهور لو عايزينه يملى 10 استادات هيملاهم، هل عدل ربنا إنك تعرض على النادي الأهلي في عوائد البث أكثر مرة ونصف على نادي الزمالك.
وأردف ميدو: أنا هقاتل مع مرتضى منصور على حق الزمالك في عوائد البث التليفزيوني مش في الرعاية، الرعاية دي حاجة شطارة من الإدارة.
وواصل: أنا في ضهر مرتضى منصور في كلامه عن توزيع عوائد البث التليفزيوني وليس من العدل أن تعرض على الزمالك 40% فقط من اللي انت عرضته على الأهلي.
وطالب أحمد حسام ميدو، جماهير الزمالك بدعم مرتضى منصور رئيس نادي الزمالك في رغبته في زيادة عوائد البث التلفزيوني المعروضة على نادي الزمالك.
واختتم حديثه قائلا: نسب مشاهدة مباريات الزمالك زي مباريات الأهلي وروحوا أون سبورتس واسألوها ولو لقيتوا حاجة مُختلفة خلاص أنا مش هتكلم.
