مصطفى كامل: مفيش مطرب مهرجانات هيغني على كيفه.. متغنيش ألفاظ خارجة وتقولي ده قديم
تحدث الفنان مصطفى كامل نقيب الموسيقيين عن القرارات التي وضعها اليوم بشأن مطربي المهرجانات، مؤكدًا أنه لن يكون هناك أي تهاون مع أي مطرب يخالف هذه القرارات.
وقال مصطفى كامل في تصريحات لـ القاهرة 24: أنا بطبق القرار على ماضي وحاضر ومستقبل، واللي عنده غنوة خارجة منهم وهشوفه بيغنيها تاني هعتبره كأنها مستحدثة، كل شكل ليهم هيتعمل هتتحاسب عليه نقابة المهن الموسيقية، وكل شخص بيدير النقابة، اللي عنده لفظ خارج متتطلعش بيه في حفلة وتقولي ده قديم، ومتصحيهوش في ودن ولادنا تاني وتكسب منه تاني.
وعن تغيير مصطلح المهرجانات لـ شعبة الأداء الصوتي، تابع مصطفى كامل: كان من زمان نفسي أشيل كلمة المهرجانات من التاريخ خالص، وذاكرنا إزاي يكون فيه ضوابط ومعايير وعملنا لجنة، وكان فيه توصيات ووجهات النظر للمجتمع كله إنه فيه استياء من شكل الكلمة ومن اللي بيحصل، ووضعنا ظوابط ومعايير، والمهم عندنا اسم مصر برا.
وأضاف: أي حد من المطربين اللي وهبهم ربنا نعمة أو رزق، أنا هحترم رزقك وإنت احترم أولاد الناس وقيمة بلدك، مفيش حاجة اسمها يغني على كيفه، اللي عايز كارنيه النقابة وعايز يزاول المهنة سواء في شعبة الأداء الصوتي، لازم يودي الكلمات لـ جهاز الرقابة على المصنفات.
شروط انضمام مطربي المهرجانات لشعبة الأداء الصوتي
حدد الفنان مصطفى كامل عددا من الشروط التي يجب أن تتوافر في مطربي مهرجانات الشعبية، وذلك قبل الانضمام لتلك الشعبة وجاءت الشروط كالآتي، يجب أن تخضع كلمات الأغنية لجهاز الرقابة، الالتزام بعدم إدراج أي كلمة تخدش الحياء أو ألفاظ أو إيماءات، بالإضافة إلى الالتزام بوجود فرقة موسيقية مصاحبة لأي فنان مكونة من 12 عضوا عاملا.
