كولر: مباراة أسوان كانت صعبة.. وهدفي علاج غياب التركيز عن اللاعبين
علق السويسري مارسيل كولر، المدير الفني للفريق الأول لكرة القدم بالنادي الأهلي، على فوز فريقه أمام نظيره أسوان في بطولة الدوري الممتاز.
تصريحات مارسيل كولر
وقال كولر في المؤتمر الصحفي عقب المباراة: كانت مباراة صعبة وبدأنا أول ربع ساعة بشكل جيد لحين إحراز الهدف، وبعد ذلك صعبنا المباراة على أنفسنا، وحدث سوء تركيز والتي استمرت لنهاية المباراة، وهو ما سبب خطورة على الفريق بدون داعي.
وأضاف كولر: محتاجين نشتغل أكتر من كدا الفترة اللي جاية، وخاصةً على نقطة التركيز وأكيد المباراة كان فيها أوقات كويسة ولكن مش ده اللي أنا عاوزه ومستنيه.
وتابع المدرب السويسري: المشكلة الأساسية اليوم كانت التركيز، ودي مشكلة اللاعب نفسه، لازم كل لاعب يكون مركز طوال المباراة مش أوقات وأوقات، وفي النهاية الفوز بهدف هو مكسب، وأنا سعيد بالطبع بالمكسب وتحقيق الثلاث نقاط.
وأكمل المدرب السويسري: مقدرش أخش في دماغ اللعيبة وأعرف إيه المخاوف أو بيفكروا إزاي وأنا عن نفسي مبفكرش غير في المباراة اللي أنا فيها وقبل مباراة اليوم لم أفكر نهائيا في مباراة الزمالك، ومن يوم ما وقعت عقدي مع الأهلي والجميع يتحدث عن مواجهة الزمالك وأنا لا أفكر في ذلك.
وواصل كولر: تغييرات اليوم لم تكن بسبب مباراة السوبر، ونمتلك عدد كبير جدا من اللاعبين ولذلك أحاول أن أعطي الجميع دقائق في المباريات حتى أراهم في الملعب لأن المباريات غير التدريبات.
وقال كولر: أسوان دافعت بشكل كويس جدا وده عملوه الماتش اللي فات وأنا تابعتهم وعارف أنهم بيعملوا كدا والنتيجة النهارده ساعدتهم على ده وهما حاولوا لآخر دقيقة لتسجيل هدف مستغلين الأخطاء.
وأردف مدرب الأهلي: أنا مش عاوز دايما نكون تحت ضغط وعاوز نجيب أهداف بدري تريحنا منفضلش مستنين لآخر دقيقة، مضيفًا: خروج ديانج بسبب شكوى بسيطة في العضلة الخلفية وفضلت تبديله على الرغم من طلب اللاعب الاستمرار في الملعب.
واختتم: أنا قولت المرة اللي فاتت وبكرر أنا بقالي 6 أسابيع بس موجود، والموسم لسه بيبدأ ومستحيل نتكلم عن تعب وإرهاق دلوقتي، الموضوع موضوع عقلية وأنا لسه في مرحلة التعرف على اللاعبين وأنا هتكلم مع لعيبتي بشكل جماعي ومنفرد عشان لازم يعرفوا أن ده مينفعش خالص خصوصا لما النتيجة تفضل معلقة وفايز بهدف بس واحنا مش عاوزين ده.
