محمود سعد لـ والد حسام حبيب بعد تصريحاته الأخيرة: الستات بتربي العيال بسبب خيبة الرجالة
لقن الإعلامي محمود سعد درسًا لـ حسين، والد الفنان حسام حبيب، بعد تصريحاته الأخيرة عن نجله، وتعنيفه له، ووصفه بأنه تربية سيدات، ليرد الإعلامي على هذا الأمر، ويهاجمه بعد سخريته من تربية السيدات، وأكد سعد أنه تربية امرأة ويفتخر بذلك.
وعلق محمود سعد على تصريحات والد حسام حبيب، من خلال فيديو له بقناته الشخصية على موقع الفيديوهات الشهير يوتيوب، قائلًا: مالها تربية الستات، الستات بتربي العيال بسبب خيبة الرجالة، بسبب قلة أدب الرجالة، بسبب ظلم وقهر الرجل للست، بيروح يتجوز ويسيب 4 عيال، تيجي في الآخر تقوله أنت تربية واحدة ست تقصد بها الإهانة؟!، أنا أظن تقصد بها الشرف لأن ده شيء عظيم.. عيب كده لازم تعتذر للستات.
وتابع محمود سعد: من أجمل الحاجات اللي حصلت لي في حياتي أن ربتني واحدة ست، عرفت يعني أي جدعنة وشهامة، وعرفت يعني أي واحدة معاها 4 عيال لوحدها من غير راجل والشارع كله يحترمها، الستات اللي حواليك دي حاجة تخصك، أنا أول ما طلعت في التلفزيون قُلت إني تربية واحدة ست وكنت فخور.
تصريحات محمود سعد
وأضاف محمود سعد: الست لما تربي نحتفل بيها، ونقولها أنتِ عظيمة وكافحتي، لأن مش ضمن مسئوليتها الأساسية أنها تربي وتنفق وتكافح عشان الأب راح أتجوز تاني، عشان القوانين عندنا فضفاضة، الراجل بمنتهى البساطة يسيب بيته ويروح يتجوز واحدة تانية.
واستكمل محمود سعد: الراجل ضايقني وزعلني، عيب كده لازم تعتذر للستات، في ظاهرة قبيحة وملفتة للنظر الناس اللي اطلقت في سن صغير كتير والقبح من الرجل كتير، الطلاق حاجة عادية، اللي عايزة يطلق يطلق بس يشوف ولاده، كفاياكم كلام قبيح عن الستات، وكفاية تجاهل لقيمة الست.
