طارق الشناوي: مصطفى كامل عنده طموح لإلغاء الغناء بالفلاشة
أعرب الناقد الفني طارق الشناوي، عن دعمه للفنان مصطفى كامل نقيب الموسيقيين، إزاء قراراته التي أصدرها في وقت سابق بشأن مطربي المهرجانات.
وقال الناقد الفني طارق الشناوي، في برنامج “القاهرة اليوم” عبر “قناة أوربت”: الغرض من إلغاء الغناء بالفلاشة عشان المطرب ممكن ميكونش صوته حلو، وقرار إلغاء الفلاشة جاء لتشغيل العازفين، والقاعدة بتقول إن المطرب يغني والعازفين يعزفوا.
الناقد الفني طارق الشناوي، أضاف: لو طبقت القواعد دي هيكون تمام، وفيه أسر هتاكل عيش في القصة دي، ومصطفى كامل عنده الطموح وأتمنى يواصل هذا الطموح.
وتحدث الفنان مصطفى كامل نقيب الموسيقيين عن القرارات التي وضعها في وقت سابق بشأن مطربي المهرجانات، مؤكدًا أنه لن يكون هناك أي تهاون مع أي مطرب يخالف هذه القرارات.
وقال مصطفى كامل في تصريحات لـ القاهرة 24: أنا بطبق القرار على ماضي وحاضر ومستقبل، واللي عنده غنوة خارجة منهم وهشوفه بيغنيها تاني هعتبره كأنها مستحدثة، كل شكل ليهم هيتعمل هتتحاسب عليه نقابة المهن الموسيقية، وكل شخص بيدير النقابة، اللي عنده لفظ خارج متتطلعش بيه في حفلة وتقولي ده قديم، ومتصحيهوش في ودن ولادنا تاني وتكسب منه تاني.
وعن تغيير مصطلح المهرجانات لـ شعبة الأداء الصوتي، تابع مصطفى كامل: كان من زمان نفسي أشيل كلمة المهرجانات من التاريخ خالص، وذاكرنا إزاي يكون فيه ضوابط ومعايير وعملنا لجنة، وكان فيه توصيات ووجهات النظر للمجتمع كله إنه فيه استياء من شكل الكلمة ومن اللي بيحصل، ووضعنا ظوابط ومعايير، والمهم عندنا اسم مصر برا.
