هاني البحيري: الفنانات مش بيلبسوا فساتين مبتذلة.. والسوشيال ميديا خلت الناس تفتكر إن المهرجانات فساتين بس
علق مصمم الأزياء هاني البحيري، على قرارت الفنان حسين فهمي، رئيس مهرجان القاهرة السينمائي، بشأن الدريس كود الخاص بالدورة الـ 44 من المهرجان.
وقال هاني البحيري، خلال حواره مع القاهرة 24: فنانات مصر مش بيلبسوا فساتين مبتذلة، ولكن في بعض الناس فاهمين الريد كاربت غلط، إن كل ما تزود يكون شكلها أحلى وملفت، ولكن أنا دايمًا شايف إن القليل هو الكتير، يعني ممكن تكون واحدة لابسة فستان بسيط جدًا وتلفت الانظار.
وأضاف: الأستاذ حسين فهمي الكبير المحترم قال إننا عايزين نعمل حاجة بسيطة تليق باسم مصر، لأن في أي مهرجان عالمي بنلاقي الفنانات لابسة فساتين بسيطة وشيك بتعبر عن ثقافة البلد.
وتابع: إحنا المرة دي أي حد جايلي بيعمل عندي فستان إحنا بنحاول نعمل توازن بين الفستان السواريه وفستان ريد كاربيت لو حد بيتكرم، دي معادلة صعبة أوي، والمرة دي أكيد هتكون ثقافة شعب بيفكر وبيلعب حلو.
وأكد هاني البحيري، أن السوشيال ميديا سبب كبير في تسليط الضوء على أزياء الفنانات بالمهرجانات، قائلًا: السوشيال ميديا هي اللي خلت الناس تفكر إن المهرجانات عبارة عن عروض أزياء، لأنها بتركز على الفساتين وبتسيب الأفلام والندوات، ومفيش تغطية إعلامية غير على الفستان والميك آب، وده غلط جدًا ولازم نوسع أفكارنا أكتر للمهرجان، ولو حد مش لابس صح مش لازم نبرز الموضوع.
