السيسي: هناك مشروعات لا تحتاج دراسات جدوى.. وبقول للبنك أما تجيلك يتم العمل معها
قال الرئيس عبد الفتاح السيسي، رئيس الجمهورية، أن هناك مشروعات تخص منتجات أو مستلزمات إنتاج لا تحتاج إلى دراسات الجدوى.
وتابع الرئيس، في كلمته منذ قليل خلال إطلاق الملتقى والمعرض الدولي الأول للصناعة، والذي ينظمه اتحاد الصناعات المصرية في مركز المنارة للمؤتمرات وذلك بمناسبة مرور 100 عام على تأسيس الاتحاد: محتاج تعمل دراسة الجدوي لموضوع مهم ليه؟!، لما طرحنا مشروعات في قائمة عن منتجات ومستلزمات إنتاج بتاخدها مصر من بره بقالها سنين، والقائمة موجودة في وزارة التجارة ووزارة المالية وتضم 150 منتجا.
أضاف السيسي: لما أعمل موضوع مش عارف أبعاده والسوق بتاعه إيه، هل محتاج متخصصين؟ وأشوف فرصة للنجاح قبل تنفيذه.. دي مشروعات لمستلزمات إنتاج ومنتجات السوق المصري مش محتاجة دراسة جدوى.
وأردف: بما إننا عندنا قوائم لمشروعات محددة بين التجارة والمالية واتحاد الغرف وطالبينها، أقول للبنك من فضلك أما تجيلك يتم العمل معاها ونبقى مستعدين نتحمل، بالطريقة دي بتاعت دراسات الجدوى ياخدوا خمس سنين وتضيع علينا خمس سنين، لكن بطريقتي ياخدوا سنة.
واستكمل السيسي: انتوا بتضيعوا وقت كتير وفرصة كبيرة جدًا وأتصور أن أي تحدي في مصر وخلال السنين اللي فاتت كان بيولد فرصة وليس عقبة لو كان عندنا الإرادة والاستعداد، وفي كتير من الأنشطة اللي بتتعمل بتحتاج دراسات في حاجات باينة وواضحة جدًا، زي المعدات كلها اللي بنجيبها.. عاوزين البلد تقوم وشعبها يحس.
ويشارك في الملتقى والمعرض الدولي الأول للصناعة، عدد كبير من المستثمرين المصريين والعرب والأجانب وممثلو المؤسسات الإقليمية والدولية ذات الشأن وأعضاء الغرف العربية الصناعية والتجارية المشتركة وممثلو البعثات الدبلوماسية لدى جمهورية مصر العربية ورجال الأعمال ومجلس إدارة اتحاد الصناعات المصرية وأعضاء الغرف الصناعية والمجالس الاستثمارية وممثلو قطاع البنوك والكيانات الاقتصادية وأعضاء الحكومات لعدد من الدول الشقيقة والصديقة ولفيف من المشاركين.
