نجل جلال الشرقاوي يكشف حقيقة تبرؤ شقيقته من أعمال والديهما
كشف تامر نجل المخرج الراحل جلال الشرقاوي، حقيقة تبرؤ شقيقته الفنانة المعتزلة عبير الشرقاوي، من أعمال والديهما، كما أُشيع خلال الفترة الماضية.
وقال نجل جلال الشرقاوي، في تصريحات خاصة لـ القاهرة 24: أختي لم تتبرأ من أعمال والدنا، الموضوع كله إن ساعة لما اتلغى مهرجان الجونة، أختي كتبت عندها على الفيسبوك، وقالت إنها مبسوطة إن مهرجان العُري اتلغى، وهي عندها حق لأن الفنانات زودوها أوي وده بيسيء ليهم وللوسط الفني، وبعدين فيه صحفية كلمتها وسألتها على البوست ده، وقالت لها إن فيه أعمال للوالد فيها عُري، وكان رد أختي عليها إنها ملهاش علاقة بـ أعمال والدي، ووالدي هو اللي يُسأل عن أعماله ودي وجهة نظرها الشخصية.
وعن تعليق الكاتب محمد الغيطي، على شائعة تبرؤ عبير الشرقاوي، من أعمال والدها، رد نجل جلال الشرقاوي: محمد الغيطي طلع وعلق على الموضوع ده في البرنامج بتاعه وقال بتتبرأ من أعمال والدها هي بتتبرأ منه إزاي؟ ده هو اللي يتبرأ منها، وقلب الموضوع، وأنا كنت مع أختي في وقت المكالمة، ومقالتش خالص إنها بتتبرأ من أعمال الوالد.
عبير الشرقاوي
وفي سياق متصل، سبق وأعربت عبير ابنة المخرج الراحل جلال الشرقاوي عن سعادتها الكبرى بإلغاء مهرجان الجونة، حيث كتبت عبر حسابها الشخصي بموقع فيس بوك: ليه مبسوطة إن المهرجان اتلغى؟، علشان كان فيه مبارزة مع الله وعند وإصرار على الفحش.
