شوبير: إمام عاشور أكتر واحد اتحفل عليه.. وتجاوز في حقي قبل كده
علق الإعلامي أحمد شوبير، على زيارة لاعب وسط الزمالك إمام عاشور، لزميله في منتخب مصر والنادي الأهلي محمد عبدالمنعم بعد إجراءه عملية على مستوى الأنف.
شوبير: إمام أكتر واحد اتحفل عليه
وقال شوبير في تصريحات إذاعية: إمام عاشور كان بيلعب مع الزمالك ضد الأهلي في السوبر في الإمارات من يومين، وإمام أكتر واحد اتحفل عليه، عشان الجون التاني ومش فاهم برده ليه، لكن اتعودنا خلاص إن التحفيل جزء أساسي من حياتنا وإذا محصلش الناس بتزعل وبتغضب وكأننا ناقصين حاجة.
وأضاف: التحفيل حاجة مش لطيفة لكن مش بالطريقة المهينة، لكن إن إمام عاشور راح زار محمد عبد المنعم، ونشر الصورة على الحسابات بتاعته على السوشيال ميديا، انتوا عارفين إحنا في زمن التعصب، لكن الولد كان عنده من الشجاعة والخلق ما يكفي إنه يزور زميله في المنتخب، وكانت لفته جميلة جدًا من إمام عاشور، لحد كده أنا بحييه، وهحكي لكم موقف مع لاعب إمام لأول مرة.
وواصل: إمام من أيام ما كان في حرس الحدود وهو لاعيب عاجبني، وأما لعب في نادي الزمالك بديلًا لـ فرجاني ساسي، وكان الناس بتقول ألحقوا وادفعوا له 2 مليون يورو في السنة، قولت أنتم مجانين ولا إيه، إمام لو لعب هيكسر الدنيا وكنت بقول عنه أفضل كلام لأنه لاعب صاعد وواعد، حتى أن جاءت مباراة الأهلي والزمالك للشباب في ملعب الجزيرة، والأهلي كسب 2-1، وحدث الخلاف من النادين، وكلاهما احتفل إنه البطل.
شوبير: إمام عاشور تجاوز في حقي من قبل
وأكمل: يومها إمام احتفل بتجاوز كبير ضد رموز النادي الأهلي، ومن ضمن الناس الذين تجاوز ضدهم كنت أنا، وكنت مندهش ومستغرب جدًا، وأقول طب أنا ليه، لأني كنت بحبه وبتكلم عنه كويس، وقتها قررت إن ميكنش ليا علاقة على المستوي الشخصي به إطلاقًا، وهو الحقيقة كان بعتلي رسالة محترمة على واتساب، وأنا الحقيقة مردتش عليها لأنه كان ولد صغير وواعد، وعدت الأيام وبعتلي مع أكتر من حد وفضلت زعلان، لكن بديله حقه تمامًا في المباريات.
وأتم: أنا عايز سلوكه في الملعب يكون على قد موهبته، وزيارته لعبدالمنعم كان لها مردود إيجابي لدى جمهوري الأهلي والزمالك، فممكن اللاعب يرجع ويدي درس إنه أتعلم من الخطأ، وده اللي احنا عايزينه، وأنا حاليًا مش زعلان منه على المستوى الشخصي.
