بهاء سلطان: مابتدخلش في شغل حد ومبحبش أعيش في الدور.. ربنا موفقني بشكل مش طبيعي
تحدث الفنان بهاء سلطان، عن زوجته مشيرًا إلى أنه يعمل على الأخذ بـ رأيها في أغلب أعماله، إذ إنها تحثه بشكل مستمر على التطوير من أدائه، كما أكد أن لا يتدخل مطلقًا في عمل أي فرد من فريق عمل أغانيه.
بسيب كل واحد يشوف شغله ومابتدخلش
وقال بهاء سلطان، خلال حواره مع الفنانة أنغام، في برنامجها الذي يحمل اسمها، والمذاع عبر شاشة قناة DMC: الملحن مهم جدًا بالنسبة لي في كل الأغاني بتاعتي، بسيب كل واحد يشوف شغله ومابتدخلش، ومبحبش أعيش في الدور لأني لو عشت هتبوظ مني، هي الفورمة دي ماشية كويس الحمد لله، وربنا موفقني بشكل مش طبيعي أوي.
وأضاف: مراتي كانت بتغني وفي معهد فنون مسرحية ولكن مكملتش، وبحب أخد رأيها في الأغاني بتاعتي واللي بتقوله بيطلع صح، وهي بتستوعب شخصية المغني وفرقت معايا كتير، وساعات بتقولي إنت ليه مبتسمعش أغاني مختلفة تغير إحساسك وتغير من أدائك.
بهاء سلطان
وكشف بهاء سلطان، في تصريحاته السابقة في برنامج أنغام، كواليس بداياته الفنية، قائلًا: في بدايتي غنيت كورال ورا حسام حسني، ووقتها كان ليها قصة بسيطة إن الأستاذ حسام حسني، كان أخته زميلتنا في الكلية، وفي مرة قالت لي مش عايز تغني؟ لأن حسام حسني وقتها كان بيعمل فريق كورال وحسام سمعني، واختارني.
وأضاف: جت فترة كنا بنسجل بنعمل شريط لأستاذ مصطفى كامل، بس كان الكورال هو اللي بيغني الأغاني دي، وحسام حسني، قال له اسمع بهاء صوته حلو وهيعجبك، وغنيت له حاجات شعبي وهو بيحب اللون ده وعجبه الموضوع، وقالي أنت صوتك يعمل شريط لوحده.
