عفاف شعيب: أتعملي سحر كتير.. والشيخ الشعراوي قالي خلي لسانك دايمًا عامر بذكر الله
كشفت الفنانة عفاف شعيب، عن تعرضها للعديد من الأسحار، مؤكدة إنها لم تتأثر بهذه الأسحار لأنها تداوم على قراءة آية الكرسي من القرآن الكريم، بالإضافة إلى مجموعة من الأذكار.
وقالت في حوارها مع الإعلامي عمرو الليثي، في برنامجه واحد من الناس، المذاع عبر شاشة قناة الحياة: زمان اتعملي سحر كتير أوي، وكانت أمي الله يرحمها تقولي اقرأي على طول يا بنتي آية الكرسي، لأنها بتمنع أي حاجة، ولما قابلت الشيخ محمد متولي الشعراوي، قالي خلي دايمًا لسانك عامر بذكر الله وإوعي تسكتي.
وأضافت عفاف شعيب: مش عايزة أقول مين اللي عملت السحر، ولكن السحر انقلب على الساحر، وفيه ناس عملولي سحر من جوا الوسط الفني وناس من برا الوسط، وأنا بحس إني مسحورة وبشوف رؤى وأنا نايمة، لأن ليا ورِد كل يوم، ومن لا ورِد له لا وارد له.
واختتمت عفاف شعيب، حديثها قائلة: لما بيكون ليك ورِد وكل يوم مع ربنا، ربنا بيكشف الحجاب عنك، وليس بين العبد وربنا ترجمان أو حجاب، وتلاقي كل حاجة ربنا كشفها، والأعمال كانت بتتعمل علشان مشتغلش وإني أبقى قاعدة في البيت على طول، ومكتأبة، وأبقى موجوعة على طول.
عفاف شعيب
كما تحدثت الفنانة عفاف شعيب، في حوارها عن خلافها مع الفنان الراحل أحمد زكي، قائلة: في ناس وقعت بيني وبين أحمد زكي في الحج بعد ما أقنعته يحج علشان ربنا يرضى عليه، فلقيت في ناس وسوسوا له وقالوا له خليك قاعد في الأوتيل وأنا قلت له لازم تروح مِنى علشان تقرأ قرآن قال لي طيب، وفجأة وإحنا قاعدين لقيته بيصرخ في وشي قال لي مش رايح معاكوا قلت له أنت حر، وفي نفس الوقت في حد قال لي إنه ما قرأش قرآن في عرفة، فقلت له ليه ما قرأتش قرآن، قال لي أنا شيطان من الشياطين، قلت له إيه الأسلوب ده، وقلت له أوعى تكلمني وروحت أوضتي وقلت خلاص مش هكلمه.
