سميحة أيوب: مهرجان شرم الشيخ الدولي يُثري الحركة المسرحية بدم الشباب الجديد
كشفت الفنانة سميحة أيوب، الرئيس الشرفي لمهرجان شرم الشيخ للمسرح الشبابي، تفاصيل الدورة الـ 7 من المهرجان، مؤكدة أنه يوجد أكتر من 20 مسرحية ستشارك في المهرجان.
وتحدثت الفنانة سميحة أيوب، خلال لقائها مع القاهرة 24، على هامش المؤتمر الصحفي للمهرجان، عن الدعم الكبير الذي ستقدمه الدورة الـ 7 من مهرجان شرم الشيخ للمسرح الشبابي، حيث قالت: المهرجان متعارف عليه، وديه الدورة الـ 7، وأما تتفرجوا على اللي هيتقدم أنتوا اللي هتحكموا، وبيثري الحركة المسرحية بدم الشباب الجديد، وبيمرنهم وبيدخلهم ورش، في 35 دولة مشاركة، وفي أكتر من 20 مسرحية هتتقدم بين المسرح ومسرح الشارع.
وتابعت الفنان سميحة أيوب حديثها عن اتجاه المنتجين إلى الأعمال الدرامية والسينما، إذ قالت: المنتجون متجهون إلى التلفزيون والسينما من زمان مش حاليا فقط، مفيش حد بيطلع وبنقول ده توجه جديد، المسرح مسرح، والسينما سينما، والممثل بيشتغل هنا وهنا، دنيا سمير غانم بتطلع في المسرح والتلفزيون علشان هي ممثلة.
سميحة أيوب: الدورة باسم الفنان نبيل الألفي
وكانت كشفت الفنانة سميحة أيوب في المؤتمر الصحفي لمهرجان شرم الشيخ عن سبب حمل الدورة السابعة من مهرجان شرم الشيخ لاسم الفنان نبيل الألفي، حيث قالت: الدورة دي باسم الفنان نبيل الألفي، هو كان صديقي ودفعتي في المعهد، وشُفت ليه شغل ولما كان مخرج من بدايته، عارفة يعني إيه نبيل الألفي رجل مثقف، ويعز عليا إن مفيش حد ولا حتى وزارة الثقافة جاب سيرته، قُلت يعني الواحد بعد ما يتكل على الله هيتنسي؟! لازم نفتكره ونشكره على كل حاجة عملها وقدمها للمسرح.
