المدير الفني لـ مهرجان القاهرة السينمائي عن ترميم الأفلام الكلاسيكية: خطوة ممتازة قدمها حسين فهمي
تحدث أندرو محسن المدير الفني لـ مهرجان القاهرة السينمائي الدولي، عن تفاصيل الدورة الـ 44 من المهرجان، مشيدًا بقرار ترميم الأفلام.
وقال أندرو محسن، خلال حواره مع قناة DMC، على هامش فعاليات الدورة الـ 44 من مهرجان القاهرة السينمائي الدولي: ترميم الأفلام الكلاسيكية خطوة ممتازة قدمها رئيس المهرجان حسين فهمي، لأن السينما المصرية تاريخها كبير وممتد، وفيه أفلام كتير جدًا أصبحت حالتها غير صالحة للعرض أو أفلام أخرى تلفت، فأنا أعتقد إنها خطوة جيدة من مهرجان القاهرة إننا رممنا فيلمين وهيتعروضوا للجمهور، وأتمنى إن وزارة الثقافة تحرص على خطوة زي دي.
وأعرب أندرو محسن، عن حماسه لعرض The Fabelmans، قائلًا: من الأفلام اللي مختلفناش عليها وقولنا لازم يكوم فيلم الافتتاح، خاصة إنه فيلم لـ مخرج كبير والفيلم جديد جدًا ومصر هي سادس دولة على مستوى العالم تعرضه وفيه عرض عالمي تاني هيحصل لاحقًا، وكمان فيه أسماء لنجوم مهمين.
وتابع: الفيلم بيتكلم عن طفل من صغره بيحب السينما والتصوير، الفيلم فيه أجزاء كتيرة عن حب السينما، وأي حد بيحب السينما هيتبسط من الفيلم.
وعن عدد الأفلام المشاركة في الدورة الـ 44 من مهرجان القاهرة السينمائي، علق قائلًا: السنة دي فيه 113 فيلم مشاركين، وإحنا قريبين جدًا من العدد بتاع السنة اللي فاتت، ومصر من الدول المشاركة بـ أفلام في المهرجان، وكمان عندنا أفلا من إسبانيا وعدة أفلام عربية منها المغرب وتونس.
كما تحدث عن معايير اختيار الأفلام، قائلًا: معايير الأفلام بنحافظ على مستوى عادي من الجودة، وبنحرص إنه يكون عرض أول في العالم، وأعتقد إننا محافظين على نفس طريقة اختيار الأفلام خلال الدورات السابقة.
