حسن الرداد: تحت تهديد السلاح أول فيلم مصري يُعرض في ألمانيا من 60 سنة
تحدث الفنان حسن الرداد عن نجاح فيلمه تحت تهديد السلاح، وأنه بعيد عن الكوميديا في عمل سينمائي له، وذلك خلال لقائه على قناة DMC ضمن حفل افتتاح مهرجان القاهرة السينمائي.
وقال حسن الرداد خلال لقائه: أنا سعيد بردود الفعل من الناس على الفيلم سواء في مصر أو الوطن العربي أو الجاليات اللي بتتفرج عليه في أمريكا وإنجلترا.
وأضاف حسن الرداد: فيلم تحت تهديد السلاح قصة حقيقية، ودي أول حاجة عجبتني في العمل، ولما كنت بشوف أفلام عالمية مستوحاة من أحداث حقيقية بيبقى ليها وقع مختلف، وكاتبها أيمن بهجت قمر ببراعة شديدة أوي، وشخصية صعبة ومركبة ومختلفة عن اللي عملته.
واستكمل الرداد حديثه: عملت الكوميدي والحمد لله لقيت نجاح في مصر وبرة مصر، وكان من السهل أعمل حاجة ناجحة مع الجمهور، ولكن حبيت آخد ريسك والحمد لله ردود الفعل كانت هايلة، وفيلم تحت تهديد السلاح أول فيلم مصري يتعرض في ألمانيا من 60 سنة وكل الحاحات دي بسطاني الحقيقة.
واختتم حسن الرداد: ببص إن العمل أو الدور يبقى مختلف عن اللي عملته قبل كده، ويبقى توقيت العمل بالنسبة للناس مقبول، وفيه عوامل كتير بتخليني أوافق على العمل أو لا.
فيلم تحت تهديد السلاح
يضم فيلم تحت تهديد السلاح العديد من الفنانين أبرزهم، حسن الرداد، مي عمر، شيرين رضا، بيومي فؤاد، أحمد بدير، عمرو عبد الجليل، فتحي عبد الوهاب، جودي مسعود، عباس أبو الحسن، والعمل من إخراج محمد عبد الرحمن حماقي.
