مصطفى فهمي: تكريم لبلبة متأخر.. وتمنيت وجود سمير صبري بافتتاح القاهرة السينمائي
أوضح الفنان مصطفى فهمي شقيق الفنان حسين فهمي رئيس مهرجان القاهرة السينمائي الدولي للدورة الـ 44، أن أهم ما يميز المهرجانات العالمية وجود ورش وندوات مهمة لصناعة السينما.
وقال مصطفى فهمي خلال لقائه ببرنامج مساء دي إم سي: أتمنى الدورة الـ 44 تبقى ناجحة زي الدورات اللي فاتت، وأهم حاجة في المهرجانات العالمية دي اللي هي الورش والندوات اللي بتتعمل، أهم من الريد كاربت وطبعًا الافتتاح له الرونق وبيشد الناس.
وأضاف: الحقيقة حسين أو رئيس المهرجان أو إدارة المهرجان ككل كان اختيارهم صح بالنسبة لتكريم لبلبة زميلة وصديقة وشايف إنها كان المفروض تُكرم من زمان وبقولها الف مبروك وسعيد بتكريمها، أما بالنسبة لتكريم المخرجة كاملة أبو ذكري فهي مخرجة شديدة ومعروفة ولها وضعها في السينما وبقولها ألف مبروك.
وعن سمير صبري، تابع مصطفى فهمي: سمير صبري حبيب الكل ومش محتاج حد يتكلم عنه، بقوله كنت أتمنى تكون لسه معانا وتحضر الدورة الـ 44.
أما عن أعماله الجديدة، أردف مصطفى فهمي: عندي فيلم السرب الفيلم قصته حلوة أوي وهو للضربة الجوية للسيد الرئيس عبد الفتاح السيسي لما حصل موقف ليبيا وفيه 17 شخص توفوا، وفيه نجوم فيه زي أحمد السقا وآسر ياسين وشريف منير ومحمد ممدوح، دوري هو رئيس المخابرات المصرية وهو دور جديد ومكتوب كويس أوي وإخراج أحمد نادر جلال ومخرج عظيم وفاهم شغله وسعيد جدًا لما طلبني في الفيلم وإني في وسط مجموعة نجوم وكلنا عاملين أدوار حلوة.
