لبلبة عن تكريمها في افتتاح القاهرة السينمائي: كنت على طبيعتي لأني بحب الجمهور
عبرت الفنانة لبلبة عن سعادتها الشديدة بتكريمها أمس في مهرجان القاهرة السينمائي، بدورته الـ 44، حيث تم منحها جائزة الهرم الذهبي التقديرية لإنجاز العمر، تقديرًا لمشوارها الفني الكبير، والذي تنوع ما بين المسرح والسينما والتليفزيون والاستعراض، واستطاعت من خلالها حجز مكانة خاصة لدى جمهورها في مصر والوطن العربي.
وقالت لبلبة لـ القاهرة 24: بشكر ربنا على تكريمي أمس لحظة وإحساس ما يتوصفش، وكنت مبسوطة جدًا إن الناس سعيدة وكنت على طبيعتي لأن مواجهة الجمهور بالنسبة لي سهلة لأني بحب الجمهور جدًا.
وبكت الفنانة لبلبة خلال تكريمها ووجهت الشكر إلى مصر ووزيرة الثقافة الدكتورة نيفين الكيلاني، وحسين فهمي رئيس مهرجان القاهرة، وجمهورها.
واستكملت: بشكر كل اللي اشتغلت معاهم الممثلين والمخرجين والعمال اللي اتربيت في وسطهم بشكرهم أوي، وبشكر كل زمايلي اللي فيه بيني وبينهم عشرة طويلة وبحبهم وعارفة أنهم بيحبوني، واستكملت باكية: دايمًا لما ببص في الكواليس بلاقي والدتي بتشجعني، ومفيش مرة ماكنتش واقفة في الكواليس، لما كانوا يعلنوا عن مهرجان القاهرة تقول لي إنتي هتتكرمي، وما يحصلش نصيب، والسنة اللي بعدها تقول لي هتتكرمي السنة دي أنت أكتر واحدة اشتغلتي وبرضه ما يحصلش نصيب، ودلوقتي أنا بحقق لها أمنية، ولكن هي مش موجودة وأنا بتكرم النهاردة.
وحكت لبلبة كواليس ولادتها قائلة: ووالدتي لما كانت حامل فيا كانت بتتفرج في السينما على فيلم وجالها وجع الولادة وبسرعة لحقوها ولو ماكنوش ودوها المستشفى كنت هتولد في السينما، كما احتفلت بعيد ميلادها الذي تزامن مع تكريمها.
