ولي أمر يتهم مُدرسًا في كرداسة بتهديد الطالبات بألفاظ خادشة: بنتي كرهت المدرسة
اتهم محمد كامل، ولي أمر طالبة بإحدى المدارس التجارية بمديرية كرداسة التعليمية، مدرس الرياضيات ك.ر، بإلقاء الشتائم وسب الطالبات والتحدث في سمعة فتاة من خارج المدرسة.
مدرس يسب الطالبات بكرداسة
وقال كامل، في تصريحات خاصة لـ القاهرة 24: معايا تسجيل كله سب وشتائم، وبيتكلم فيه عن بنت تعمل في سنتر مجاور للمدرسة يتهمها في شرفها، مضيفا: بيهدد البنات، وبنتي كرهت المدرسة بسببه.
وتابع: بيهدد البنات إنه هيسقطهم لو مخدوش دروس معاه، وإنه بإيده يدخلهم الجامعة أو لا، وناس كتير بتشتكي منه، هو بيستخدم أسلوب بلطجة.
وأضاف ولي الأمر: أنا ذنب بنتي تسمع ألفاظ زي ديه ليه في الفصل؟.. نفسي يبقى في حل يمنع إن ده يحصل، مؤكدا أنه في الوقت الحالي ليس موجودا في المنطقة، ولكن بمجرد عودته من السفر سيقدم شكوى بالتسجيل الذي معه.
وأكمل: المدرس بيحلف بالطلاق للفتيات، وبيقول على بنت في السنتر إنها متجوزة عرفي.. مال بناتنا بالسنتر؟.. هل ده كلام ينفع يتقال للطلبة.
ولي أمر يناشد المسئولين
وناشد ولي الأمر وزارة التربية والتعليم قائلا: إحنا عايزين الحق، ومش عاوزين بلطجة، المدرسين اللي زيه بوظوا سمعة التعليم، زمان مكنش فيه الكلام ده، متابعا: في كذا ولي أمر كلمني وخايفين منه، لإنهم بيقولوا عليه دجال.
وأردف حديثه قائلا: المدرسة معملتش حاجة، ولما قلت لهم معايا دليل، قالوا لي معلش هو مضغوط وحاولوا يلموا الموضوع، ولكن في ناس من إدارة كرداسة التعليمية تواصلوا معايا وقالوا لي شرفنا وهنحل الموضوع، بس أنا لسة في السفر.
واختتم حديثه: المدرس داخل يقولي أنا هعمل محضر ضدك لأنك سجلت لي في المدرسة، وهددني بتحويل البنت للتحقيق.
